അച്ചൻകോവിലാർ കരകവിഞ്ഞൊഴുകി; ചാരുംമൂട് മേഖലയിൽ വ്യാപകനാശം

lead package ചാരുംമൂട്: തുടർച്ചയായ മഴയിൽ അച്ചൻകോവിലാർ കരകവിഞ്ഞൊഴുകി ചാരുംമൂട്​ മേഖലയിൽ നിരവധി വീടുകൾ ​വെള്ളത്തിലായി. വ്യാപകനാശം. ഇടപ്പോൺ ആറ്റുവായിൽ കൂടുതൽ വീടുകൾ വെള്ളത്തിലായി. ആറ് കരകവിഞ്ഞൊഴുകി ആറ്റുവ, ചെറുമുഖ പ്രദേശങ്ങളിൽ നൂറോളം വീടുകൾ വെള്ളത്താല്‍ ചുറ്റപ്പെട്ടു. ​ഇതോടെ ആളുകൾ വീടൊഴിഞ്ഞുതുടങ്ങി. ഗൃഹോപകരണങ്ങളടക്കം നശിച്ചു. നാട്ടുകാർ രക്ഷാപ്രവർത്തനം നടത്തി. കഴിഞ്ഞ വെള്ളപ്പൊക്കത്തിൽ വീട്​ വൃത്തിയാക്കി താമസം തുടങ്ങിയതിന് തൊട്ടുപിന്നാലെയാണ് ദുരിതം എത്തിയത്​. ആറ്റുവ മഹാദേവ ക്ഷേത്രക്കടവിന്​ സമീപത്തുകൂടി ആറ്റുവെള്ളം കയറുന്നത്​ തടയാൻ തടയണ കെട്ടിയെങ്കിലും ഫലമുണ്ടായില്ല. പുത്തൻകാവ് ക്ഷേത്രത്തിന്​ സമീപ റോഡും വെള്ളത്തിലാണ്. കിഴക്കൻ വെള്ളത്തി​ൻെറ ശക്തി കൂടിയാൽ ഇടപ്പോൺ പ്രദേശം വെള്ളത്തിൽ മുങ്ങും. അച്ചൻകോവിലാറ്റിൽനിന്നും കരിങ്ങാലിച്ചാൽ പുഞ്ച വഴി ഒഴുകിയെത്തിയ വെള്ളത്താൽ നൂറനാട് - പന്തളം റോഡിലെ മാവിളപ്പടി ജങ്ഷൻ വഴിയുള്ള ഗതാഗതം തടസ്സപ്പെട്ടു. മാവേലിക്കര - പന്തളം റോഡിലെ ഐരാണിക്കുടി ഭാഗത്തും ഗതാഗത തടസ്സം നേരിടുന്നു. അച്ചൻകോവിലാറ്റിൽ കിഴക്കൻ വെള്ളത്തി​ൻെറ ശക്തി കുറഞ്ഞാലേ റോഡുകളിൽ ഇപ്പോഴുള്ള വെള്ളം തിരിച്ചിറങ്ങൂ. ചാരുംമൂട്, ആനയടി, ശാസ്താംകോട്ട, നൂറനാട് ഭാഗത്തുള്ളവർക്ക് പന്തളത്ത്​ എത്താൻ കിലോമീറ്ററോളം ചുറ്റിക്കറങ്ങി സഞ്ചരിക്കേണ്ടി വരുന്നു. കരിങ്ങാലിച്ചാൽ, പെരുവേലിച്ചാൽ പുഞ്ചകളിൽ ആറ്റുവെള്ളം നിറഞ്ഞു. പുഞ്ചയോട്​ ചേർന്ന കരകൃഷികളും നശിച്ചു. നൂറനാട് നെടുകുളഞ്ഞിമുറി കിഴക്കേത്തറ കിഴക്കേതിൽ കാർത്തികേയ​ൻെറ വീട്ടിലെ 18 തൊടി താഴ്​ചയുള്ള കിണർ ഇടിഞ്ഞുതാഴ്​ന്നു. ചാരുംമൂട് കൃഷി അസി. ഡയറക്ടർ ഓഫിസി​ൻെറ പരിധിയിൽവരുന്ന നൂറനാട്, പാലമേൽ, ചുനക്കര, താമരക്കുളം, വള്ളികുന്നം, ഭരണിക്കാവ് പഞ്ചായത്തുകളിലായി 75 ലക്ഷം രൂപയുടെ കൃഷി നശിച്ചതായി അധികൃതർ അറിയിച്ചു. ------------ ഫോട്ടോ: 1 അച്ചൻകോവിലാർ കരകവിഞ്ഞതിനെത്തുടർന്ന് ചാരുംമൂട്​ മേഖലയിലെ വീടുകളിൽ വെള്ളം കയറിയപ്പോൾ ------ 2. നൂറനാട് നെടുകുളഞ്ഞിമുറി കിഴക്കേത്തറ കിഴക്കേതിൽ കാർത്തികേയ​ൻെറ കിണർ ഇടിഞ്ഞുതാഴ്​ന്നപ്പോൾ ---------- 3. നൂറനാട്-പന്തളം റോഡിൽ വെള്ളം കയറിയപ്പോൾ