ആവർത്തിച്ച്​ പക്ഷിപ്പനി ക്രിസ്​മസ്​ വിപണി നഷ്​ടം; നിരാശയിൽ താറാവുകർഷകർ

കോഴി വിപണിക്കും തിരിച്ചടി *സർക്കാറിനും ബാധ്യത ആലപ്പുഴ: ക്രിസ്​മസ്​ വിപണി ലക്ഷ്യമിട്ട്​ താറാവ്​ വളർത്തിയ കർഷകർക്ക്​ തിരിച്ചടിയായി പക്ഷിപ്പനി. കോവിഡിൽനിന്ന്​ കരകയറിവരുന്നതിനിടെയാണ്​ പക്ഷിപ്പനി കർഷകരെ ദുരിതത്തിലാക്കിയത്​. ആഘോഷങ്ങളോടനുബന്ധിച്ചോ സീസണിലോ ആണ്​ ഇടിത്തീയായി പക്ഷിപ്പനി പടർന്ന്​ കർഷകരെ ദുരിതക്കയത്തിലാക്കുന്നത്​. കുട്ടനാട്ടിലെ കർഷകർക്ക്​ നെൽകൃഷിക്കുപുറമെ പ്രധാന ജീവനോപാധിയാണ്​ താറാവുകൃഷി. കൈനകരി, പുന്നപ്ര നോർത്ത്​, സൗത്ത്​, അമ്പലപ്പുഴ നോർത്ത്​, സൗത്ത്​, പുറക്കാട്, ചെറുതന, രാമങ്കരി, ആര്യാട്​, തൃക്കുന്നപ്പുഴ, കുമാരപുരം, പള്ളിപ്പാട്​, വീയപുരം, തലവടി, തകഴി, എടത്വ, മുട്ടാർ, ചമ്പക്കുളം, പുളിങ്കുന്ന്​ പഞ്ചായത്ത്​ പരിധികളിലാണ്​ പക്ഷിപ്പനി സ്ഥിരീകരിച്ചത്​. ഇൗ പഞ്ചായത്തിലും ആലപ്പുഴ, ഹരിപ്പാട്​ നഗരസഭ പ്രദേശത്തും താറാവ്, കോഴി, കാട, വളർത്തുപക്ഷികൾ എന്നിവയുടെ മുട്ട, ഇറച്ചി, കാഷ്ഠം (വളം) എന്നിവയുടെ ഉപയോഗവും വിപണനവും നിരോധിച്ച്​ കലക്​ടർ ഉത്തരവിട്ടിരുന്നു. നേരിട്ടും അല്ലാതെയും താറാവുകൃഷിയെ ആശ്രയിക്കുന്ന​ നൂറുകണക്കിന്​ പേരാണ്​ ഇവിടങ്ങളിലുള്ളത്​. വീടുകളിൽ താറാവിനെ വളർത്തി ചെറുകിട കച്ചവടം നടത്തുന്ന ഒ​ട്ടേറെ വീട്ടമ്മമാർ ആലപ്പുഴ ജില്ലയിലെമ്പാടുമുണ്ട്​. താറാവ്​, കോഴി എന്നിവയുടെ ഇറച്ചിയും മുട്ടയും വിറ്റാണ്​ ഇവർ വരുമാനം കണ്ടെത്തുന്നത്​. സർക്കാർ പരിശോധനകേന്ദ്രത്തിൽ രോഗബാധ സ്ഥിരീകരിക്കുന്നതടക്കം പല കടമ്പകൾക്കൊടുവിലാണ്​ കർഷകരെ തേടി നഷ്​ടപരിഹാരമെത്തുക. കൊല്ലുന്ന താറാവുകൾക്ക്​ നഷ്​ടപരിഹാരം കിട്ടണമെങ്കിൽ കേന്ദ്രസർക്കാറി​ൻെറ പരിശോധനകേന്ദ്രത്തിൽനിന്ന്​ ഫലം കിട്ടണം. സാംപിൾ എടുത്താലും ഭോപാലിൽനിന്ന്​ രോഗം സ്ഥിരീകരിച്ച്​ കിട്ടാൻ രണ്ടാഴ്​ചയെങ്കിലും എടുക്കും. രോഗം സംശയിച്ചാലും സ്ഥിരീകരിക്കുന്നത്​ വരെ ഇവക്ക്​ തീറ്റ നൽകണം. കൊല്ലേണ്ടിവരുമെന്ന്​ ഏതാണ്ട്​ ഉറപ്പുണ്ടായാലും തീറ്റ കൊടുക്കേണ്ടി വരുന്നതിലൂടെയും കർഷകന്​ നഷ്​ടമുണ്ട്​. കാലതാമസം രോഗവ്യാപനത്തിനും ഇടയാക്കുന്നു. ഉചിത നഷ്​ടപരിഹാരം ലഭിക്കുമെന്ന പ്രതീക്ഷയിലാണ്​ കർഷകർ. കോഴി വിപണിയെയും ബാധിക്കുന്നു ക്രിസ്​മസ്​ കാലത്ത്​ ഡിമാൻഡുള്ള കോഴിയിറച്ചിക്കും പക്ഷിപ്പനി ഭീഷണിയാണ്​. പക്ഷിപ്പനി ഇറച്ചി​േക്കാഴി വിപണിയെയും തകർക്കുകയാണ്​. ദിനേന 100-150 കോഴികളെ വിറ്റിരുന്ന ചെറുകിട കച്ചവടക്കാരും 1000-1500 വരെ കോഴികളെ വിൽക്കുന്ന മൊത്തവ്യാപാരികളും പറയുന്നത്​ കച്ചവടം പാതിയായി കുറഞ്ഞെന്നാണ്​. ഹോട്ടലുകളിലും തട്ടുകടകളിലും പക്ഷിപ്പനി കാരണം ഓംലറ്റിനും ചെലവ്​ കുറഞ്ഞെന്ന്​ നടത്തിപ്പുകാർ പറയുന്നു. ദോശയും ഓംലറ്റും വൈകുന്നേരങ്ങളിൽ കാര്യമായി ചെലവായിരുന്നിടത്ത്​ പലരും ഓംലറ്റ്​ ഒഴിവാക്കിത്തുടങ്ങി. ​താറാവുവിഭവങ്ങൾ ക്രിസ്​മസ്​ തീൻമേശയിൽ കാര്യമായി ഇടപിടിക്കില്ലെന്നത്​ ആഘോഷത്തിനും തിരിച്ചടിയാണ്​. കർഷകനും സർക്കാറിനും ബാധ്യത ക്രിസ്​മസ്​ സീസണോടടുപ്പിച്ച്​ മിക്ക വർഷങ്ങളിലും റിപ്പോർട്ട്​ ചെയ്യുന്ന പക്ഷിപ്പനി കർഷകനെ കണ്ണീരിലാഴ്​ത്തു​േമ്പാൾതന്നെ സർക്കാറിനും അധിക സാമ്പത്തികബാധ്യതയാണ്​ ഉണ്ടാക്കുന്നത്​. മൂന്ന്​ തവണയായി ജില്ലയിൽ നഷ്​ടപരിഹാരമായി നൽകിയത്​ 14 കോടി രൂപയാണ്​. താറാവ്​ ഒന്നിന്​ 300 രൂപ വീതം മൃഗസംരക്ഷണ വകുപ്പിൽനിന്നാണ്​ നഷ്​ടപരിഹാരം നൽകുന്നത്​. ഇത്​ മറയാക്കി ലാഭം കൊയ്യുന്നവരുമുണ്ട്​. നഷ്​ടം കണക്കാക്കുന്നതിൽ കൃത്രിമം നടക്കുന്നതായി കർഷകരും സമ്മതിക്കുന്നു. 2014ൽ 3.8 കോടി, 2016 ഒമ്പത്​ കോടി, 2021 ജനുവരിയിൽ 1.10 കോടി വീതമാണ്​ താറാവുകർഷകർക്ക്​ നഷ്​ടപരിഹാരം നൽകിയത്​. മുൻകരുതൽ നടപടിയോ ശാശ്വ​തപരിഹാരമോ ഇല്ലാത്തതാണ്​ പ്രശ്​നം. പഞ്ചായത്തുകളുടെ തനത്​ ഫണ്ടിൽനിന്നാണ്​ താറാവുകളെ കൊല്ലുന്ന നടപടിക്ക്​ തുക ചെലവിടേണ്ടത്​. കോവിഡ്​കാലത്ത്​ വരുമാന പ്രതിസന്ധി നേരിടുന്നതിനിടെ ഈ ചെലവുകൂടി താങ്ങാനാകാത്ത സ്ഥിതിയാണ്​​ പഞ്ചായത്തുകൾക്ക്​​. വിറകുക്ഷാമം മൂലം നെടുമുടി, കരുവാറ്റ പഞ്ചായത്തുകളിൽ ഇക്കുറി പക്ഷികളെ കൊല്ലുന്നത്​ മാറ്റിവെക്കേണ്ടിവന്നു. വിറക്​, ചാക്ക്​​, പഞ്ചസാര, ഡീസൽ, തൊഴിലാളികൾ തുടങ്ങിയവക്കുള്ള തുകയാണ്​ പഞ്ചായത്തുകൾ ലഭ്യമാക്കേണ്ടത്​.