വളവുനിറഞ്ഞ റോഡിന്​ സമീപം കോണ്‍ക്രീറ്റ് വേലി; പ്രതിഷേധം

ചേർത്തല: അര്‍ത്തുങ്കല്‍ -പെരുമ്പാറ റോഡരികില്‍ അപകട മേഖലയില്‍ കോണ്‍ക്രീറ്റ് വേലി സ്ഥാപിച്ചതിൽ പ്രതിഷേധം. നിർമാണം തടയണമെന്നുകാട്ടി പൊലീസിന്​ പഞ്ചായത്ത് സെക്രട്ടറി നിർദേശം നല്‍കിയെങ്കിലും ഇതുമറികടന്ന്​ നിർമാണം പൂര്‍ത്തിയാക്കിയതായാണ് ആക്ഷേപം. പഞ്ചായത്ത് അനുമതിയില്ലാതെയുള്ള നിർമാണത്തിനെതിരെ തുടര്‍ നടപടികളിലേക്ക്​ നീങ്ങുകയാണ് ഗ്രാമപഞ്ചായത്ത്. തുടര്‍ച്ചയായി അപകടമുണ്ടാകുന്നതാണ് അര്‍ത്തുങ്കൽ -പെരുമ്പാറ റോഡ്. റോഡിനുസമീപം സ്ഥലമില്ലാത്തതാണ് ഇവിടെ പലപ്പോഴും അപകടങ്ങള്‍ക്ക്​ കാരണമാകുന്നതെന്ന് പ്രദേശവാസികള്‍ പറഞ്ഞു. രണ്ടു വാഹനങ്ങള്‍ ഒന്നിച്ചുവന്നാല്‍ കാല്‍നടയാത്രികരും സൈക്കിള്‍ ഇരുചക്രവാഹനങ്ങളും ഒതുക്കാന്‍ പ്രയാസപ്പെടുന്ന സ്ഥിതിയാണ്. ഈ സാഹചര്യത്തിലും പുതിയ നിർമാണങ്ങള്‍ റോഡരികില്‍ നടത്തുന്നതാണ് പ്രതിഷേധങ്ങള്‍ക്കിടയാക്കിയത്. വിഷയത്തില്‍ ശക്തമായ ഇടപെടലുകള്‍ വേണമെന്ന ആവശ്യമുയര്‍ന്നിട്ടുണ്ട്.