മാനവികതയുടെ ഇഫ്താറൊരുക്കി യുവസുഹൃത്തുക്കൾ

മണ്ണഞ്ചേരി: മാനവികതയുടെ ഇഫ്താർ വിരുന്നൊരുക്കി യുവസുഹൃത്തുക്കൾ. മണ്ണഞ്ചേരി അമ്പനാകുളങ്ങര മുഹ്​യിദ്ദീൻ ജുമാമസ്ജിദിലാണ് സഹോദര്യത്തി‍ൻെറയും മാനവികതയുടെയും മത സൗഹാർദത്തി‍ൻെറയും മാതൃകയൊരുക്കിയത്​. അമ്പനാകുളങ്ങര പറവേലിവേളി ദാസ‍ൻെറ മക്കളായ വിനോദ് (പൊലീസ്), പ്രേംദാസ് (കയർ ഇൻഡസ്​ട്രി), സുഹൃത്തുക്കളായ സോണിലാൽ (കേരള സ്പിന്നേഴ്സ്), വികാസ് (പൊലീസ്) എന്നിവരാണ് വിഭവസമൃദ്ധമായ നോമ്പുതുറ ഒരുക്കിയത്​. റമദാനിലെ പുണ്യം​ ഏറെയുള്ള അവസാന പത്തിലെ 29ാം രാവിലാണ് ഇഫ്താർ ഒരുക്കിയത്. നേരത്തേ, പള്ളിയിലെത്തി തയാറാക്കിയ പായസം ഉൾപ്പെടെയുള്ള വിഭവങ്ങൾ ബാങ്ക് വിളിച്ചയുടൻ നോമ്പ് തുറക്കുവേണ്ടി എത്തിയ ഇരുന്നൂറിൽപരം പേർക്ക്​ വിതരണംചെയ്തു. കഴിഞ്ഞ രണ്ടുവർഷമായി കോവിഡ് കാരണം അടച്ചിട്ടിരുന്ന പള്ളികളിൽ വിശ്വാസികൾ വളരെ സന്തോഷത്തോടും ആഹ്ലാദത്തോടും കൂടിയാണ് നോമ്പുതുറ സൽക്കാരങ്ങളിലും പ്രാർഥനകളിലും പങ്കെടുക്കുന്നത്. അമ്പനാകുളങ്ങര പള്ളിയിൽ മുൻകാലങ്ങളിൽ ഇതര സമുദായത്തിൽപെട്ട സഹോദരങ്ങൾ നോമ്പുതുറ സൽക്കാരം നടത്തുന്നത് പതിവാണ്. നോമ്പ് 13ന്​ സ്ഥിരമായി കെ. അജിത്കുമാർ കുന്നേൽ വാഴപ്പള്ളിയാണ് നടത്തുന്നത്. മസ്ജിദ് പ്രസിഡന്റ് പി.കെ.എം. നസീർ, സെക്രട്ടറി എ.എം. നൂറുദ്ദീൻ ഇമാം ലുക്മാനുൽ ഹക്കീം ബാഖവി തുടങ്ങിയവർ ചേർന്ന് സ്വീകരിച്ചു. APL ifthar ഇഫ്താർ വിരുന്നൊരുക്കിയ സുഹൃത്തുക്കൾ പള്ളി ഭാരവാഹികൾക്കും നാട്ടുകാർക്കുമൊപ്പം