വേളാങ്കണ്ണി, ധൻബാദ്​ സ്​പെഷൽ ട്രെയിനുകൾക്ക്​ അനുമതി -കൊടിക്കുന്നിൽ

ആലപ്പുഴ: എറണാകുളത്തുനിന്ന്​ കോട്ടയം, കൊല്ലം, ചെങ്കോട്ട വഴി വേളാങ്കണ്ണിയിലേക്കുള്ള സ്പെഷൽ ട്രെയിനും എറണാകുളത്തുനിന്ന് ധൻബാദിലേക്കുള്ള സ്പെഷൽ ട്രെയിനും ഓടിക്കാൻ റെയിൽവേ ബോർഡ് അനുമതി നൽകിയതായി കൊടിക്കുന്നിൽ സുരേഷ് എം.പി അറിയിച്ചു. നേരത്തേ ഈ രണ്ട് ട്രെയിനും എത്രയും വേഗം സർവിസ് ആരംഭിക്കണം എന്നാവശ്യപ്പെട്ട്​ സതേൺ റെയിൽവേ ജനറൽ മാനേജറുമായി കൊടിക്കുന്നിൽ ചർച്ച നടത്തിയിരുന്നു. തുടർന്നാണ്​ സതേൺ റെയിൽവേ ചീഫ് ഓപറേറ്റിങ് വിഭാഗം ഈ രണ്ടു ട്രെയിനും ആരംഭിക്കുന്നതിനു വേണ്ടി റെയിൽവേ ബോർഡിന്റെ അനുമതി തേടിയത്. കോട്ടയം-കൊല്ലം പാസഞ്ചർ ട്രെയിനും പുനലൂർ-കൊല്ലം പാസഞ്ചർ ട്രെയിനും തുടങ്ങുന്നതിന്​ സതേൺ റെയിൽവേ, റെയിൽവേ ബോർഡിന്റെ അനുമതിക്ക്​ നിർദേശം സമർപ്പിച്ചിട്ടുണ്ടെന്നും കൊടിക്കുന്നിൽ അറിയിച്ചു.