ദേശീയപാത സ്ഥലമെടുപ്പ്​ കച്ചവടക്കാർക്ക്​ നഷ്​ടപരിഹാരം ഒന്നിനും തികയില്ല; കിട്ടുക 75,000 രൂപ

സാധനങ്ങൾ മാറ്റാൻ അരലക്ഷം; നഷ്​ടപരിഹാരം കാൽ ലക്ഷം ആലപ്പുഴ: ദേശീയപാതക്കായി സ്ഥലമെടുക്കുമ്പോൾ ഒഴിപ്പിക്കുന്ന കച്ചവടക്കാർക്ക്​ ദേശീയപാത അതോറിറ്റി നൽകുന്ന പരമാവധി നഷ്​ടപരിഹാരം 75,000 രൂപ. ഇതിൽ 50,000 രൂപ കടയിലെ സാധനങ്ങൾ മാറ്റുന്നതിനാണ്. ബാക്കിതുക കച്ചവടക്കാർക്കുള്ള ഒറ്റത്തവണ നഷ്​ടപരിഹാരവും. വടക്കൻ ജില്ലകളിൽ സ്ഥലമെടുത്ത വേളയിൽ ഇത്തരത്തിലാണ് നഷ്​ടപരിഹാരം നൽകിയത്. കച്ചവടക്കാർ വാടകശീട്ട്, തദ്ദേശസ്ഥാപന ലൈസൻസ്, പാൻ കാർഡ്, ബാങ്ക് അക്കൗണ്ട്, ആധാർ കാർഡ് എന്നിവയുടെ പകർപ്പുകൾ സഹിതമാണ് അപേക്ഷിക്കേണ്ടത്. ജില്ലയിൽ തിങ്കളാഴ്​ച മുതൽ അപേക്ഷ സ്വീകരിക്കും. കടയുടമ തന്നെയാണ്​ കച്ചവടം നടത്തുന്നതെങ്കിൽ ഈയിനത്തിൽ നഷ്​ടപരിഹാരം ലഭിക്കുമോയെന്നതിൽ വ്യക്തതയില്ല. വീട് പൂർണമായി നഷ്​ടപ്പെടുന്നവർക്ക് പ്രധാനമന്ത്രി ഭവന പദ്ധതിപ്രകാരം 1.5 ലക്ഷം രൂപ അനുവദിക്കും. സാധനങ്ങൾ മാറ്റുന്നതിന് 50,000 രൂപയും. കുടുംബത്തി​ൻെറ ജീവനോപാധികൾക്ക്​ നഷ്​ടമുണ്ടായാൽ പരമാവധി 36,000 രൂപകൂടി നൽകും. മൂന്ന് ഇനത്തിലായി 2,36,000 രൂപവരെ വീട്​ നഷ്​ടപ്പെടുന്നവർക്ക്​ കിട്ടാം. ദേശീയപാതക്ക്​ ഭൂമിയേറ്റെടുക്കുന്നതിലൂടെ വീട്ടിൽ താമസിക്കാനാകാത്ത സാഹചര്യമുള്ളവർക്കുമാത്രമാണ് ഈ ആനുകൂല്യം. 1956ലെ ദേശീയപാത നിയമപ്രകാരമാണ് ഭൂമിയേറ്റെടുക്കൽ വിജ്ഞാപനം പ്രസിദ്ധീകരിച്ചിട്ടുള്ളത്. എന്നാൽ, ഭൂമിക്കും അതിലെ നിർമിതികൾ, മരങ്ങൾ, കൃഷി എന്നിവക്കുള്ള നഷ്​ടപരിഹാരം 2013ലെ കേന്ദ്രസർക്കാറി​ൻെറ ഭൂമിയേറ്റെടുക്കൽ പ്രകാരമാണ്. ഇതി​ൻെറ ഒന്നാം ഷെഡ്യൂളിലാണ് ഈയിനത്തിലെ നഷ്​ടപരിഹാരം സംബന്ധിച്ച്​ പരാമർശമുള്ളത്. ഇതു പൂർണമായി അംഗീകരിച്ചിട്ടുണ്ടെങ്കിലും രണ്ടാം ഷെഡ്യൂളിലെ പദ്ധതിബാധിതരുടെ പുനരധിവാസം സംബന്ധിച്ച വ്യവസ്ഥകളിൽ ചിലതു മാത്രമാണ്​ ദേശീയപാതക്ക്​ ഭൂമിയേറ്റെടുക്കലിൽ ബാധകമാക്കിയിട്ടുള്ളത്. ഇതിലൊന്നു വീട് നഷ്​ടപ്പെടുന്നവർക്കു സഹായം നൽകുന്നതാണ്. മറ്റൊന്നാണ് കച്ചവടക്കാർക്കുള്ള നഷ്​ടപരിഹാരം. കലക്​ടർ അധ്യക്ഷനായ 11 അംഗ കമ്മിറ്റിയാണ്​ വീടിനും കടകൾക്കുമുള്ള നഷ്​ടപരിഹാരം നിർണയിക്കുന്നത്. ജില്ലയിൽ ഇതിന്​ കമ്മിറ്റി രൂപവത്കരിച്ച്​ സർക്കാർ ഗസറ്റ് വിജ്ഞാപനം പ്രസിദ്ധീകരിച്ചു. എന്നാൽ, ഇതിലേക്ക്​ അംഗങ്ങളെ നാമനിർദേശം ചെയ്​തിട്ടില്ല.