338 പേര്‍ക്ക് കോവിഡ്

ആലപ്പുഴ: ജില്ലയില്‍ 338 പേര്‍ക്കു കൂടി കോവിഡ് സ്ഥിരീകരിച്ചു. 315 പേര്‍ക്ക് സമ്പര്‍ക്കത്തിലൂടെയാണ് രോഗ ബാധ. മൂന്ന് ആരോഗ്യപ്രവര്‍ത്തകരും രോഗബാധിതരായി. 20 പേരുടെ സമ്പര്‍ക്ക ഉറവിടം വ്യക്തമല്ല. 545 പേര്‍ രോഗമുക്തരായി. നിലവിൽ 3293 പേര്‍ ചികിത്സയിലുണ്ട്​. ചൂട്​: മുന്‍കരുതല്‍ വേണം -ആരോഗ്യവകുപ്പ്​ ആലപ്പുഴ: വേനല്‍ച്ചൂട് ശക്തമാകുന്ന സാഹചര്യത്തില്‍ മുന്‍കരുതല്‍ സ്വീകരിക്കണമെന്ന് ജില്ല മെഡിക്കല്‍ ഓഫിസര്‍ (ആരോഗ്യം) ഡോ. ജമുന വര്‍ഗീസ് അറിയിച്ചു. ശ്രദ്ധിക്കേണ്ട കാര്യങ്ങള്‍: * ചൂടു മൂലമുള്ള ആരോഗ്യ പ്രശ്നങ്ങള്‍ ഒഴിവാക്കുന്നതിന് ധാരാളം വെള്ളം കുടിക്കണം. *തിളപ്പിച്ചാറിയ വെള്ളം മാത്രം കുടിക്കുക. * ഉപ്പിട്ട കഞ്ഞിവെള്ളം, മോരുംവെള്ളം, നാരങ്ങാവെള്ളം, കരിക്കിന്‍വെള്ളം തുടങ്ങിയ പാനീയങ്ങള്‍ ജലനഷ്ടവും ലവണനഷ്ടവും പരിഹരിക്കാന്‍ സഹായകമാണ്. * കാര്‍ബണേറ്റഡ് കൃത്രിമപാനീയങ്ങള്‍ ഒഴിവാക്കണം. * വീട്ടില്‍ പാനീയങ്ങള്‍ തയാറാക്കുമ്പോഴും തിളപ്പിച്ചാറിയ വെള്ളം മാത്രം ഉപയോഗിക്കുക. * സാലഡ്, ചട്‌നി തുടങ്ങി പാചകം ചെയ്യാതെ കഴിക്കുന്ന ഭക്ഷണസാധനങ്ങളിലും തിളപ്പിച്ചാറിയ വെള്ളം മാത്രം ചേര്‍ക്കാന്‍ ശ്രദ്ധിക്കുക. * പഴങ്ങളും പച്ചക്കറികളും വൃത്തിയായി കഴുകിയശേഷം മാത്രം ഉപയോഗിക്കുക. പഴങ്ങളുടെയും മറ്റും തൊലി/തോട് നീക്കുന്നതിന് മുമ്പ്​ കഴുകാന്‍ ശ്രദ്ധിക്കണം. * ജലദൗര്‍ലഭ്യം നേരിടുന്ന സ്ഥലങ്ങളില്‍ താമസിക്കുന്നവര്‍ കുടിവെള്ളം ശേഖരിച്ച്​ വെക്കുന്ന പാത്രങ്ങള്‍ വശങ്ങള്‍ ഉള്‍പ്പെടെ നന്നായി തേച്ചു കഴുകണം. പാത്രം മൂടി വെക്കണം. കുടിവെള്ളം ശേഖരിച്ച്​ വെക്കുന്ന പാത്രം വളര്‍ത്തു മൃഗങ്ങള്‍ കടക്കാത്ത സ്ഥലങ്ങളില്‍ സൂക്ഷിക്കണം. * ആഹാരസാധനങ്ങള്‍ ഈച്ച കടക്കാത്ത വിധം മൂടി സൂക്ഷിക്കണം. * വയറിളക്കത്തിന്‍റെ ലക്ഷണങ്ങള്‍ കണ്ടാല്‍ ഡോക്ടറുടെ നിർദേശാനുസരണം ചികിത്സ നടത്തണം.