ഷവർമയുടെ മണം പിടിച്ച്​ സിംഹവാലൻ കുരങ്ങ്​; കോവിഡ്​ മറന്ന്​ കാണികളായി ജനക്കൂട്ടം

അരൂർ: ഷവർമയുടെയും അൽഫാമിന്‍റെയും ​കൊതിയൂറും ഗന്ധം പരന്നതോ​െട വായിൽ കപ്പലോടിക്കാനുള്ള വെള്ളവുമായി കടയുടെ ചവിട്ടുപടിയിൽ 'കക്ഷി' ഇരിപ്പുറപ്പിച്ചു. തിരിഞ്ഞും മറിഞ്ഞും നോക്കി അരമണിക്കൂറിലേറെ ഇരിപ്പ്​ തുടർന്നപ്പോൾ കടയുടമ ഒരു ബ്രഡ്​ നീട്ടി സൽകരിക്കാൻ ശ്രമിച്ചു. എന്നാൽ, ഷവർമ കൊതിച്ചു വന്ന വിരുന്നുകാരന്​ ബ്രഡ്​ കണ്ടപ്പോൾ അത്രക്ക്​ പിടിച്ചില്ല; കാത്തിരിപ്പ്​ മതിയാക്കി ഓടിയൊളിച്ചു.

എഴുപുന്ന തെക്ക് കരുമാഞ്ചേരിയിലെ ഷവർമകടയിലാണ് കൗതുകക്കാഴ്ചയൊരുക്കി സിംഹവാലൻ കുരങ്ങ് എത്തിയത്. നിരവധി മതിലുകളും മരങ്ങളും കയറിയിറങ്ങി ഒടുവിൽ അൽഫാം, ഷവർമ കടയുടെ മുന്നിൽ കാവലിരിക്കുകയായിരുന്നു ടിയാൻ. ഇതോടെ കോവിഡ് മാനദണ്ഡങ്ങൾ ലംഘിച്ച് നിരവധി ആളുകൾ കുരങ്ങിനെ കാണാൻ തിങ്ങിക്കൂടി. ഈ സമയം അൽഫാം, ഷവർമ എന്നിവയുടെ പാചകം നടക്കുന്നുണ്ടായിരുന്നു. ഇതിന്‍റെ മണം പിടിച്ചതു കൊണ്ടാകാം കുരങ്ങ് കടയുടെ ചവിട്ടുപടിയിൽ തന്നെ ഇരുന്നു. ഒടുവിൽ കടയുടമ ഒരുകഷണം ബ്രഡ് കൊടുത്തതോടെ സ്ഥലം വിടുകയായിരുന്നു.

എഴുപുന്ന ജങ്​ഷൻ മുതലാണ്​ കുരങ്ങിനെ നാട്ടുകാർ കണ്ടത്​. റോഡിലൂടെ നടന്നും നിരവധി വീടുകളുടെ മതിലുകളിൽ കയറിയിറങ്ങിയുമായിരുന്നു യാത്ര. കൈലാസം ബസ് സ്റ്റോപ്പിനു തെക്കുഭാഗത്ത് മുരിങ്ങ മരത്തിൽ കയറിയ കുരങ്ങ് ധാരാളം മുരിങ്ങയില കഴിച്ചു. ഈ സമയം വഴിയാത്രികൻ പഴം നീട്ടിയപ്പോൾ അയാളുടെ നേരെ ചീറ്റി.

കുരങ്ങ് എവിടെ നിന്നാണ് എത്തിയതെന്ന് ആർക്കുമറിയില്ല. ചരക്കു ലോറിയിലോ മറ്റോ കയറിപ്പറ്റി എത്തിയതാണെന്നാണ്​ കരുതുന്നത്​.