കു​ടി​വെ​ള്ളം കി​ട്ടാ​തെ വി​വി​ധ പ​ഞ്ചാ​യ​ത്തു​ക​ൾ

ചാ​രും​മൂ​ട്: ചാ​രും​മൂ​ട് മേ​ഖ​ല​യി​ലെ താ​മ​ര​ക്കു​ളം, നൂ​റ​നാ​ട്, ചു​ന​ക്ക​ര, പാ​ല​മേ​ൽ പ​ഞ്ചാ​യ​ത്തു​ക​ളി​ൽ കു​ടി​വെ​ള്ള​ക്ഷാ​മം അ​തി​രൂ​ക്ഷം. ക​നാ​ൽ തു​റ​ക്ക​ണ​മെ​ന്ന ആ​വ​ശ്യം ശ​ക്ത​മാ​ണ്. ക്ഷാ​മം പ​രി​ഹ​രി​ക്കാ​ൻ കെ.​ഐ.​പി ക​നാ​ൽ തു​റ​ക്കാ​നും ഇ​തു​വ​രെ ന​ട​പ​ടി​യാ​യി​ല്ല. ഈ ​പ​ഞ്ചാ​യ​ത്തു​ക​ളി​ൽ ഇ​പ്പോ​ൾ പാ​റ്റൂ​ർ കു​ടി​വെ​ള്ള പ​ദ്ധ​തി​യി​ൽ​നി​ന്നാ​ണ് വെ​ള്ള​മെ​ത്തു​ന്ന​ത്. എ​ന്നാ​ൽ, താ​മ​ര​ക്കു​ള​മ​ട​ക്ക​മു​ള്ള പ​ഞ്ചാ​യ​ത്തു​ക​ളി​ലും ഭാ​ഗി​ക​മാ​യാ​ണ് ജ​ല​വി​ത​ര​ണം. മേ​ഖ​ല​യി​ൽ താ​മ​ര​ക്കു​ളം പ​ഞ്ചാ​യ​ത്തി​ലാ​ണ് പ്ര​ശ്നം ഏ​റെ​യു​ള്ള​ത്. പ​ഞ്ചാ​യ​ത്തി​ലെ വേ​ട​ര​പ്ലാ​വി​ലും പേ​രൂ​ർ​ക്കാ​രാ​ഴ്മ​യി​ലും കു​ടി​വെ​ള്ളം കി​ട്ടി​യി​ട്ട് ഒ​രു​മാ​സ​ത്തി​ലേ​റെ​യാ​യി. പ​ഞ്ചാ​യ​ത്തി​ലെ ജ​ല​വി​ത​ര​ണ ശൃം​ഖ​ല​യി​ലെ അ​പാ​കം​മൂ​ല​വും കു​ടി​വെ​ള്ള​വി​ത​ര​ണം കാ​ര്യ​ക്ഷ​മ​മാ​യി ന​ട​ക്കു​ന്നി​ല്ല.

പ​രി​ശോ​ധി​ച്ചി​ട്ടും ത​ക​രാ​ർ ക​​​ണ്ടെ​ത്താ​നാ​യി​ല്ല

ജ​ല​അ​തോ​റി​റ്റി ഓ​ഫി​സി​ൽ​നി​ന്ന്‌ ജീ​വ​ന​ക്കാ​രെ​ത്തി പ​രി​ശോ​ധ​ന ന​ട​ത്തി​യെ​ങ്കി​ലും ത​ക​രാ​ർ ക​ണ്ടെ​ത്താ​നും പ്ര​ശ്‌​ന​ങ്ങ​ൾ എ​ന്താ​ണെ​ന്ന്​ തി​രി​ച്ച​റി​ഞ്ഞ്​ പ​രി​ഹ​രി​ക്കാ​നും ക​ഴി​ഞ്ഞി​ട്ടി​ല്ല. ജ​ല​ജീ​വ​ൻ​മി​ഷ​ൻ പ​ദ്ധ​തി​യി​ൽ ധാ​രാ​ളം കു​ടി​വെ​ള്ള ക​ണ​ക്‌​ഷ​നു​ക​ൾ ന​ൽ​കി​യി​ട്ടു​ള്ള താ​മ​ര​ക്കു​ളം പ​ഞ്ചാ​യ​ത്തി​ൽ എ​ല്ലാ​യി​ട​ത്തും വെ​ള്ളം എ​ത്തു​ന്നി​ല്ലെ​ന്നും ജ​ല​വി​ത​ര​ണ​ശൃം​ഖ​ല​യി​ലെ അ​പാ​ക​ത മൂ​ലം കു​ടി​വെ​ള്ള​വി​ത​ര​ണം കാ​ര്യ​ക്ഷ​മ​മാ​യി ന​ട​ക്കു​ന്നി​ല്ലെ​ന്നും ആ​ക്ഷേ​പ​മു​ണ്ട്. ജ​ല​വി​ത​ര​ണ​ശൃം​ഖ​ല ശ​ക്തി​പ്പെ​ടു​ത്തു​ന്ന​തി​നാ​യി ഇ​രു​മ്പ്​ പൈ​പ്പു​ക​ൾ താ​മ​ര​ക്കു​ളം പ​ച്ച​ക്കാ​ട്ടു​ള്ള ജ​ല​സം​ഭ​ര​ണി​യി​ൽ​നി​ന്ന്‌ നെ​ടി​യാ​ണി​ക്ക​ൽ ക്ഷേ​ത്ര​ജ​ങ്ഷ​ൻ​വ​രെ​യും ചാ​വ​ടി ജ​ങ്ഷ​ൻ വ​രെ​യും സ്ഥാ​പി​ച്ചെ​ങ്കി​ലും പ്ര​യോ​ജ​ന​മു​ണ്ടാ​യി​ല്ല. വ​ർ​ഷ​ങ്ങ​ൾ പ​ഴ​ക്ക​മു​ള്ള ജ​ല​വി​ത​ര​ണ പൈ​പ്പു​ക​ളാ​ണ് പ​ഞ്ചാ​യ​ത്തി​ലെ ഭൂ​രി​ഭാ​ഗം സ്ഥ​ല​ത്തു​മു​ള്ള​ത്.

ര​ണ്ട​ര ല​ക്ഷം ലി​റ്റ​ർ ശേ​ഷി​യു​ള്ള 40 വ​ർ​ഷം പ​ഴ​ക്ക​മു​ള്ള പ​ച്ച​ക്കാ​ട്ടെ ജ​ല​സം​ഭ​ര​ണി​ക്ക് ബ​ല​ക്ഷ​യ​വു​മു​ണ്ട്. ജ​ല​വി​ത​ര​ണം കാ​ര്യ​ക്ഷ​മ​മാ​ക്കാ​ൻ പ​ഞ്ചാ​യ​ത്തി​ലു​ട​നീ​ളം പു​തി​യ പൈ​പ്പു​ക​ൾ ഇ​ട​ണ​മെ​ന്ന ആ​വ​ശ്യം ശ​ക്ത​മാ​ണ്.

കെ.​ഐ.​പി ക​നാ​ൽ തു​റ​ക്ക​ണം

കു​ടി​വെ​ള്ള​ക്ഷാ​മം പ​രി​ഹ​രി​ക്കാ​ൻ കെ.​ഐ.​പി ക​നാ​ൽ തു​റ​ക്കാ​നും ന​ട​പ​ടി​യാ​യി​ല്ല. ഇ​തി​ന്​ മു​ന്നോ​ടി​യാ​യി വൃ​ത്തി​യാ​ക്കു​ന്ന ജോ​ലി ഇ​ക്കു​റി പ​ഞ്ചാ​യ​ത്തു​ക​ൾ​ക്ക്​ തു​ട​ങ്ങാ​നാ​യി​ട്ടി​ല്ല. ക​നാ​ലു​ക​ൾ കാ​ടു​പി​ടി​ച്ച് ഇ​ഴ​ജ​ന്തു​ക്ക​ളു​ടെ താ​വ​ള​വു​മാ​യി മാ​റി. തൊ​ഴി​ലു​റ​പ്പ്​ തൊ​ഴി​ലാ​ളി​ക​ളെ​ക്കൊ​ണ്ടാ​ണ് ക​നാ​ൽ​വൃ​ത്തി​യാ​ക്കു​ന്ന​ത്. എ​ന്നാ​ൽ, ആ​വ​ർ​ത്ത​ന സ്വ​ഭാ​വ​മു​ള്ള ജോ​ലി​ക​ൾ തൊ​ഴി​ലു​റ​പ്പ്​ പ​ദ്ധ​തി​യി​ൽ ചെ​യ്യ​രു​തെ​ന്ന കേ​ന്ദ്ര​സ​ർ​ക്കാ​ർ ഉ​ത്ത​ര​വാ​ണ് പ​ഞ്ചാ​യ​ത്തു​ക​ൾ​ക്ക്​ വി​ന​യാ​യി.

മൂ​ന്നു വ​ർ​ഷ​ത്തി​ലൊ​രി​ക്ക​ൽ മാ​ത്ര​മേ ഒ​രേ പ​ണി​ക​ൾ ചെ​യ്യാ​ൻ പാ​ടു​ള്ളൂ​വെ​ന്നാ​ണ് നി​ർ​ദേ​ശം. ചാ​രും​മൂ​ട്ടി​ൽ​നി​ന്ന്​ പേ​രൂ​ർ​ക്കാ​രാ​ഴ്മ​വ​ഴി വേ​ട​ര​പ്ലാ​വി​നു​ള്ള കെ.​ഐ.​പി ഉ​പ​ക​നാ​ൽ വ​ർ​ഷ​ങ്ങ​ൾ ക​ഴി​ഞ്ഞി​ട്ടും പ​ണി​പൂ​ർ​ത്തി​യാ​യി​ട്ടി​ല്ല. വെ​ള്ള​മി​ല്ലാ​ത്ത​തി​നാ​ൽ വാ​ഴ​യും പ​ച്ച​ക്ക​റി​ക​ളും അ​ട​ക്ക​മു​ള്ള വി​ള​ക​ൾ ക​രി​ഞ്ഞു​ണ​ങ്ങി​യ സ്ഥി​തി​യി​ലാ​ണ്‌.