രണ്ടാം കുട്ടനാട്‌ പാക്കേജ്​; ആലപ്പുഴ ജില്ലയിൽ നടപ്പാക്കുന്നത്​ 32 പ്രവൃത്തികൾ

ആ​ല​പ്പു​ഴ: ര​ണ്ടാം കു​ട്ട​നാ​ട്‌ പാ​ക്കേ​ജി​ല്‍ ഉ​ള്‍പ്പെ​ടു​ത്തി ഭ​ര​ണാ​നു​മ​തി ല​ഭി​ച്ച 100 കോ​ടി​യു​ടെ പ്ര​വൃ​ത്തി​ക​ളി​ല്‍ ജി​ല്ല​യി​ൽ ന​ട​പ്പാ​ക്കു​ന്ന​ത്​ 32 എ​ണ്ണം. ഇ​തി​ൽ ഏ​റെ​യും കു​ട്ട​നാ​ട്​ താ​ലൂ​ക്കി​ലാ​ണ്. 43.17 കോ​ടി​യു​ടെ പ്ര​വൃ​ത്തി​ക​ളാ​ണ്​ ജി​ല്ല​യി​ലെ പ​ദ്ധ​തി​ക​ൾ​ക്കാ​യി നീ​ക്കി​വെ​ച്ചി​രി​ക്കു​ന്ന​ത്. ബാ​ക്കി തു​ക ചെ​ല​വ​ഴി​ക്കു​ന്ന​ത്‌ കോ​ട്ട​യം ജി​ല്ല​യി​ലാ​ണ്‌. പാ​ട​ശേ​ഖ​രം ന​വീ​ക​ര​ണം, പു​റം​ബ​ണ്ട്​ ബ​ല​പ്പെ​ടു​ത്ത​ൽ, മോ​ട്ടോ​ർ​ത​റ പു​ന​ർ​നി​ർ​മാ​ണം, മോ​ട്ടോ​ർ സ്ഥാ​പി​ക്ക​ൽ, ക​ലു​ങ്ക്​ നി​ർ​മാ​ണം എ​ന്നി​വ​യാ​ണ്​ ന​ട​പ്പാ​ക്കു​ക. ഒ​ന്നാം കു​ട്ട​നാ​ട്‌ പാ​ക്കേ​ജി​ല്‍ ഉ​ള്‍പ്പെ​ടു​ത്തി ചെ​യ്‌​ത പ്ര​വൃ​ത്തി​ക​ള്‍ ഭൂ​രി​ഭാ​ഗ​വും കു​ട്ട​നാ​ടി​ന്‌ പു​റ​ത്താ​ണെ​ന്ന ആ​ക്ഷേ​പം ഉ​ണ്ടാ​യി​രു​ന്നു. ഇ​പ്പോ​ൾ അ​നു​വ​ദി​ച്ച​തി​ൽ പ​കു​തി​യോ​ളം തു​ക ജി​ല്ല​ക്ക്​ ല​ഭി​ച്ചു എ​ന്ന​ത്​ ആ​ശ്വാ​സ​മാ​ണ്.

പ്ര​വൃ​ത്തി​ക​ൾ ഉ​ട​ൻ ടെ​ൻ​ഡ​ർ ചെ​യ്യും. മാ​ർ​ച്ച്​ 31ന്​ ​മു​മ്പ്​ ടെ​ൻ​ഡ​ർ പൂ​ർ​ത്തി​യാ​ക്കി പ്ര​വൃ​ത്തി​ക​ൾ ന​ട​പ്പാ​ക്കാ​നാ​ണ്​ ചു​മ​ത​ല​യു​ള്ള ഇ​റി​ഗേ​ഷ​ൻ വ​കു​പ്പി​ന്‍റെ തീ​രു​മാ​നം. ഇ​ത് സം​ബ​ന്ധി​ച്ച സ​ർ​ക്കാ​ർ ഉ​ത്ത​ര​വ് ല​ഭി​ച്ചാ​ൽ ഉ​ട​ൻ സാ​ങ്കേ​തി​ക അ​നു​മ​തി വാ​ങ്ങാ​ൻ ബ​ന്ധ​പ്പെ​ട്ട ഉ​ദ്യോ​ഗ​സ്ഥ​ർ​ക്ക് കു​ട്ട​നാ​ട് പാ​ക്കേ​ജ് സ്പെ​ഷ​ൽ ഓ​ഫി​സ് നി​ർ​ദേ​ശം ന​ൽ​കും.

ആ​ല​പ്പു​ഴ, കോ​ട്ട​യം, പ​ത്ത​നം​തി​ട്ട ജി​ല്ല​ക​ളി​ലാ​യി വ്യാ​പി​ച്ചു​കി​ട​ക്കു​ന്ന കു​ട്ട​നാ​ട്, അ​പ്പ​ർ​കു​ട്ട​നാ​ട് മേ​ഖ​ല​യി​ൽ പ്ര​വ​ർ​ത്ത​നം വേ​ഗ​ത്തി​ലാ​ക്കാ​ൻ മൂ​ന്ന് എ​ക്സി.​എ​ൻ​ജി​നീ​യ​ർ​മാ​രു​ടെ നേ​തൃ​ത്വ​ത്തി​ലാ​ണ് പ​ദ്ധ​തി ന​ട​പ്പാ​ക്കു​ന്ന​ത്. ആ​റു​ക​ളു​ടെ​യും തോ​ടു​ക​ളു​ടെ​യും നീ​രൊ​ഴു​ക്ക് സു​ഗ​മ​മാ​ക്കി കൃ​ഷി​ക്ക് സ​ഹാ​യ​ക​മാ​ക്കു​ന്ന​തി​നാ​ണ് സ​ർ​ക്കാ​ർ തു​ക വി​നി​യോ​ഗി​ക്കാ​ൻ പ​ദ്ധ​തി ത​യാ​റാ​ക്കി​യി​ട്ടു​ള്ള​ത്.

ക​ർ​ഷ​ക​രു​ടെ ദീ​ർ​ഘ​നാ​ള​ത്തെ ആ​വ​ശ്യ​ങ്ങ​ളി​ലൊ​ന്നാ​യി​രു​ന്നു പാ​ട​ശേ​ഖ​ര​ങ്ങ​ളു​ടെ​യും പു​റം​ബ​ണ്ടു​ക​ളു​ടെ​യും ന​വീ​ക​ര​ണം. പു​റ​മെ ചാ​ലു​ക​ളി​ൽ എ​ക്ക​ലും മ​ണ്ണും അ​ടി​ഞ്ഞ്​ നീ​രൊ​ഴു​ക്ക് ത​ട​സ്സ​പ്പെ​ട്ട​തും ക​ർ​ഷ​ക​ർ​ക്ക് തി​രി​ച്ച​ടി​യാ​യി​രു​ന്നു. വി​വി​ധ സം​ഘ​ട​ന​ക​ളും ഇ​തേ ആ​വ​ശ്യം ഉ​ന്ന​യി​ച്ച് നി​ര​വ​ധി സ​മ​ര​ങ്ങ​ൾ ന​ട​ത്തി​യി​രു​ന്നു.

2020 സെ​പ്​​റ്റം​ബ​ർ 17നാ​ണ് 2447.6 കോ​ടി​യു​ടെ ര​ണ്ടാം കു​ട്ട​നാ​ട് പാ​ക്കേ​ജ് മു​ഖ്യ​മ​ന്ത്രി പ്ര​ഖ്യാ​പി​ച്ച​ത്.

ജ​ല​സേ​ച​നം, കൃ​ഷി, വ്യ​വ​സാ​യം, വൈ​ദ്യു​തി, ടൂ​റി​സം, ഫി​ഷ​റീ​സ്, മൃ​ഗ​സം​ര​ക്ഷ​ണം, വാ​ട്ട​ർ അ​തോ​റി​ട്ടി വ​കു​പ്പു​ക​ളാ​ണ് പ​ദ്ധ​തി ത​യാ​റാ​ക്കി​യ​ത്.