കാലവർഷത്തിനു മുമ്പേ പള്ളിത്തോട്ടിൽ തിരമാലകൾ ആഞ്ഞടിക്കുന്നു
text_fieldsപള്ളിത്തോട് മേഖലയിലെ കടലോരത്ത് കടൽഭിത്തിതകർന്നപ്പോൾ
തുറവൂർ: കാലവർഷം ശക്തിപ്രാപിക്കുംമുമ്പേ എത്തിയ തിരമാലകൾ പള്ളിത്തോട് തീരങ്ങളിൽ നിർമിച്ച താൽക്കാലിക മണൽ വാടകൾ തകർത്തെറിഞ്ഞു. ഒരുമാസം മുമ്പ് തിരമാലകൾ നാശം വിതച്ച പള്ളിത്തോട് മുതൽ തെക്കേ ചെല്ലാനം വരെയുള്ള മണൽ വാടയാണ് പല ഭാഗത്തും തകർത്തത്.
കാലവർഷം ശക്തിപ്രാപിക്കുന്നതോടെ ഈ പ്രദേശങ്ങളിൽ കടൽവെള്ളം കയറും. ഇവിടെ തകർന്നുകിടക്കുന്ന കടൽഭിത്തിക്കു മുകളിലാണ് മണൽ വാട നിർമിച്ചിരിക്കുന്നത്. തെക്കേ ചെല്ലാനം മുതൽ അന്ധകാരനഴി വരെ കടൽഭിത്തി പൂർണമായും തകർന്നുകിടക്കുകയാണ്. പള്ളിത്തോട് പല ഭാഗത്തും പേരിനുപോലും കടൽഭിത്തിയില്ല. . മണൽവാട നിർമിച്ച് പ്രതിരോധം സൃഷ്ടിക്കുന്നത് ശാശ്വത പരിഹാരമല്ലെങ്കിലും അധികൃതർ ഈ രീതിയാണ് എല്ലാ വർഷവും സ്വീകരിക്കുന്നതെന്നു തീരദേശവാസികൾ പറഞ്ഞു. സമീപ പ്രദേശങ്ങളായ വേട്ടയ്ക്കൽ ആറാട്ടുവഴിയിലും ഒറ്റമശ്ശേരിയിലും കടൽഭിത്തിയില്ലാത്തതു മൂലം സമാനമായ കടൽക്ഷോഭമാണ് എല്ലാ വർഷവും ഉണ്ടാകുന്നത്. ടെട്രാപോഡ് ഉപയോഗിച്ചുള്ള കടൽഭിത്തി നിർമിക്കാൻ അടിയന്തര നടപടിയുഉണ്ടാകണമെന്നാണ് തീരദേശ വാസികളുടെ ആവശ്യം.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.