സെക്യൂരിറ്റി ജീവനക്കാരന്‍റെ മൊബൈൽ കവർന്നയാൾ പിടിയിൽ

കൊച്ചി: നടുറോഡിൽ സെക്യൂരിറ്റി ജീവനക്കാരനെ തലക്കടിച്ചു വീഴ്ത്തി മൊബൈൽ ഫോണും പഴ്‌സും കവർന്ന സംഭവത്തിൽ മൂന്നംഗ സംഘത്തിലെ ഒരാൾ പിടിയിൽ. കുമ്പളങ്ങി സ്വദേശി അലിയെയാണ് (42) എറണാകുളം സെൻട്രൽ പൊലീസ് അറസ്റ്റ് ചെയ്തത്. ബുധനാഴ്ച മൂന്നിന്​ ബാനർജി റോഡിലായിരുന്നു സംഭവം. കടവന്ത്രയിലെ ഫ്ലാറ്റിലെ സെക്യൂരിറ്റി ജീവനക്കാരനായ പ്രദീപ്കുമാറിനെയാണ് അലി ഉൾപ്പെട്ട മൂന്നംഗ സംഘം തലയ്ക്കടിച്ചു വീഴ്ത്തിയശേഷം മൊബൈൽ ഫോണും പഴ്‌സും കൈക്കലാക്കിയത്. തുടർന്ന് സി.സി.ടി.വി ദൃശ്യങ്ങൾ കേന്ദ്രീകരിച്ച് പൊലീസ് നടത്തിയ അന്വേഷണത്തിലാണ് അലിയെ പിടികൂടിയത്. മറ്റുപ്രതികൾക്കായി തിരച്ചിൽ തുടരുന്നു.