എൽ.ഡി.എഫ്​ സ്ഥാനാർഥിയെ പിന്തുണച്ച്​ കോൺഗ്രസ്​ വിട്ട നേതാക്കൾ

പലാരിവട്ടം: തൃക്കാക്കര ഉപതെരഞ്ഞെടുപ്പിൽ എൽ.ഡി.എഫ്​ സ്ഥാനാർഥി ഡോ. ജോ ജോസഫിനെ പിന്തുണച്ച്​ കോൺഗ്രസ്​ വിട്ട്​ നേതാക്കൾ. ഈ അടുത്തകാലത്തും ഉപതെരഞ്ഞെടുപ്പുമായി ബന്ധപ്പെട്ടും​ സംഘടന വിട്ടവരാണ്​​ എൽ.ഡി.എഫ് തെരഞ്ഞെടുപ്പ്​ കമ്മിറ്റി ഓഫിസിൽ വാർത്തസമ്മേളനം നടത്തിയത്​. മുൻ കെ.പി.സി.സി ജനറൽ സെക്രട്ടറിയും നിലവിൽ ഒഡേപെക്​ ചെയർമാനുമായ കെ.പി. അനിൽകുമാർ, ഡി.സി.സി ജനറൽ സെക്രട്ടറിമാരായിരുന്ന എം.ബി. മുരളീധരൻ, രതികുമാർ, കോൺഗ്രസ്​ നേതാക്കളായിരുന്ന എ.ബി. സാബു, ഷെറീഫ് മരയ്ക്കാർ എന്നിവരാണ്​ കെ.വി. തോമസിനൊപ്പം വാർത്തസമ്മേളനത്തിൽ പ​ങ്കെടുത്തത്. താൻ കോൺഗ്രസുകാരനായി തുടർന്ന്​ ഇടതുമുന്നണിയെ പിന്തുണക്കുമെന്ന്​ കെ.വി. തോമസ്​ പറഞ്ഞു. സി.പി.എം ജില്ല സെക്രട്ടറി സി.എൻ. മോഹനൻ, ഡോ. സെബാസ്റ്റ്യൻ പോൾ എന്നിവരും വാർത്തസമ്മേളനത്തിൽ പ​ങ്കെടുത്തു.