ബൈക്ക്​ തെന്നിമറിഞ്ഞ്​ യുവാവ്​ മരിച്ചു

ആലപ്പുഴ: നിയന്ത്രണംവിട്ട ബൈക്ക് തെന്നിമറിഞ്ഞ് യുവാവ് മരിച്ചു. ഒപ്പമുണ്ടായിരുന്ന രണ്ടുപേർക്ക്​ പരിക്ക്​. ആലപ്പുഴ അവലൂക്കുന്ന് കളമ്പുകാട്ടിൽ മുഹമ്മദ് ഷരീഫിന്റെ മകൻ ഹു​വൈസാണ്​​ (20) മരിച്ചത്. ആലപ്പുഴ അവലൂക്കുന്ന് വാർഡിൽ മൂരിക്കുളം വീട്ടിൽ ആദർശ് (18), പുന്നമട വാർഡിൽ വടക്കൂട്ടച്ചിറയിൽ അനീസ് (19) എന്നിവർക്കാണ് പരിക്കേറ്റത്. ഞായറാഴ്ച രാത്രി 10.30ന് തലവടി കൊറ്റംകുളങ്ങര റോഡിൽ ആര്യാട് പള്ളിമുക്കിന് സമീപമായിരുന്നു അപകടം. വേഗത്തിലെത്തിയ ബൈക്ക് റോഡരികിൽ കിടന്ന കല്ലിൽതട്ടി തെന്നിമറിഞ്ഞു. തുടർന്ന്​ സമീപത്തെ ജുമാമസ്ജിദിന്റെ നേർച്ചക്കുറ്റിയിലേക്ക്​ ഇടിച്ച്​ മൂവരും തെറിച്ചുവീണു. അപകടത്തിൽപെട്ടവരെ ആലപ്പുഴ ജനറൽ ആശുപത്രിയിൽ എത്തിച്ചെങ്കിലും ഹുവൈസ്​ മരിച്ചു. ആദർശിന്റെ കാലിന് ഒടിവുണ്ട്. അനീസിനും പരിക്കുണ്ട്. ഇരുവരും ജനറൽ ആശുപത്രിയിൽ ചികിത്സയിലാണ്. ഖബറടക്കം ചൊവ്വാഴ്​ച ഉച്ചക്ക്​ 12ന്​ തെക്കൻ ആര്യാട്​ ജുമാമസ്​ജിദ്​ ഖബർസ്ഥാനിൽ. മാതാവ്​: ഷഹ്​ന. സഹോദരി: ഫാത്തിമ. APD huvaise ഹുവൈസ്​