വൈദ്യപരിശോധനയുടെ പേരിൽ ചൂഷണം; ഖത്തര്‍ വിസ സെന്ററിനെതി​രെ പരാതി പെരുകുന്നു

കൊച്ചി: വൈദ്യപരിശോധനയുടെ പേരിൽ ഉദ്യോഗാർഥികളെ ചൂഷണം ചെയ്ത്​ കൊച്ചിയിലെ ഖത്തര്‍ വിസ സെന്റര്‍. ഇവർ നിർദേശിക്കുന്ന സ്ഥാപനങ്ങളിൽതന്നെ പരിശോധനക്ക്​ നിർബന്ധിക്കുന്നതിനൊപ്പം, മെഡിക്കല്‍ വെരിഫിക്കേഷന്‍ നേരത്തേ തന്നെ പൂര്‍ത്തിയാക്കിയ പൂര്‍ണാരോഗ്യവാന്മാരെപ്പോലും തുടര്‍പരിശോധനക്കും മറ്റും നിർബന്ധിച്ച്​ അയക്കുന്നതായും പരാതിയുണ്ട്​​. വിസ അപ്രൂവൽ നടപടിക്കുശേഷം വൈദ്യപരിശോധനക്കും ബയോ മെട്രിക് നടപടികൾക്കും കൊച്ചിയിലെ വിസ സെന്ററിൽ എത്തുന്ന ഉദ്യോഗാർഥികൾക്കാണ് ദുരിതവും സാമ്പത്തിക നഷ്ടവും സംഭവിക്കുന്നത്. അഞ്ചുതവണയിലധികം ഓഫിസിൽ കയറിയിറങ്ങേണ്ട സ്ഥിതിയാണുള്ളത്​. വിസ ലഭിച്ച്​ ഒരാഴ്ചക്കുള്ളിൽ ജോലിയിൽ പ്രവേശിക്കേണ്ടവർ വരെ ദിവസങ്ങളോളം ഓഫിസിൽ കയറിയിറങ്ങേണ്ടി വരുന്നു​. വ്യത്യസ്ത പരിശോധനക്കായി ആയിരങ്ങൾ ചെലവാക്കി നേടുന്ന ഫിറ്റ്‌നസ് റിപ്പോർട്ട് ഖത്തറിലേക്ക് അയക്കാതെ മനഃപൂർവം വൈകിപ്പിക്കുന്നുവെന്ന ആക്ഷേപവുമുണ്ട്​. നിശ്ചിതദിവസം വരാൻ കഴിയാത്തവരിൽനിന്ന്​​ പുതിയ അപ്പോയ്‌മെന്‍റിനായി 2700 രൂപവരെ ഈടാക്കുന്നുവെന്നും ഉദ്യോഗാർഥികൾ പറയുന്നു​. വ്യത്യസ്ത സ്വകാര്യ ആശുപത്രികളിലേക്കും ലാബുകളിലേക്കും അയക്കുന്നത് മൂലം ലഭിക്കുന്ന കമീഷനുകളും ഉൾപ്പെടെ വൻ അഴിമതി ഇവിടെ നടക്കുന്നതായാണ്​ ആരോപണം. ഇക്കാരണത്താൽ ഇതര സംസ്ഥാനങ്ങളിലെ സെന്‍ററുകളിലേക്ക്​ പരിശോധനക്ക്​ പോകുന്നവരും നിരവധിയാണ്​. സിംഗപ്പൂർ കേന്ദീകരിച്ച്​ പ്രവർത്തിക്കുന്ന ഏജൻസിക്കാണ്​ ഇതിന്‍റെ നടത്തിപ്പ്​ ചുമതല. കൂടുതൽ സുതാര്യമാർഗത്തിൽ പ്രവർത്തിക്കുന്നവർക്ക് സെന്ററിന്‍റെ നടത്തിപ്പ്​ കൈമാറണമെന്നാണ്​ ഉദ്യോഗാർഥികളുടെ ആവശ്യം. പ്രവാസി വെല്‍ഫെയര്‍ ഫോറം, ഇൻകാസ് തുടങ്ങിയ സംഘടനകൾ ഇതു സംബന്ധിച്ച്​ നിരവധി നിവേദനങ്ങൾ നൽകിയിട്ടുണ്ട്​.