മോഷ്ടിച്ച ബൈക്കുകൾ വിൽപന നടത്തുന്ന തമിഴ്നാട്ടുകാരൻ പിടിയിൽ

മട്ടാഞ്ചേരി: കേരളത്തിൽനിന്ന്​ മോഷ്ടിച്ച് കടത്തുന്ന ബൈക്കുകൾ തമിഴ്നാട്ടിൽ വാങ്ങി വിൽന നടത്തിവന്നിരുന്ന പ്രതി മട്ടാഞ്ചേരി പൊലീസി‍ൻെറ പിടിയിലായി. തമിഴ്നാട് തിരുവണ്ണാമലൈ സ്വദേശി ദാമോദരനെയാണ് (30) മട്ടാഞ്ചേരി അസി. പൊലീസ് കമീഷണർ വി.ജി. രവീന്ദ്രനാഥിന്റെ നേതൃത്വത്തിൽ അറസ്റ്റ് ചെയ്തത്‌. ഈ കേസിൽ നേരത്തേ പിടിയിലായ അന്തർസംസ്ഥാന വാഹനമോഷണ കേസ് പ്രതി ഫോർട്ട്കൊച്ചി സ്വദേശി ഷിറാസ് ഇയാളുടെ പങ്കാളി റിൻഷാദ് എന്നിവരിൽനിന്ന്​ ലഭിച്ച വിവരത്തി‍ൻെറ അടിസ്ഥാനത്തിലാണ്​ അറസ്റ്റ്​. ഫോർട്ട്കൊച്ചി, മട്ടാഞ്ചേരി ഭാഗങ്ങളിൽനിന്ന് മോഷ്ടിച്ച മൂന്ന് ബുള്ളറ്റുകളും പ്രതിയിൽനിന്ന് കണ്ടെടുത്തു. പശ്ചിമകൊച്ചിയിലുണ്ടായ വാഹന മോഷണ കേസുകളിൽ തുമ്പുണ്ടാക്കാൻ ഡി.സി.പി കുര്യാക്കോസി‍ൻെറ നിർദേശ പ്രകാരം മട്ടാഞ്ചേരി അസി. കമീഷണറുടെ നേതൃത്വത്തിൽ രൂപവത്​കരിച്ച പ്രത്യേക സംഘമാണ് പ്രതിയെ പിടികൂടിയത്. എസ്.ഐമാരായ കെ.ആർ. രൂപേഷ്, എം.പി. മധുസൂദനൻ, സീനിയർ സിവിൽ പൊലീസ് ഓഫിസർമാരായ മേഘനാഥൻ, എഡ്വിൻ റോസ്, കെ.ടി. അനീഷ്, സിവിൽ പൊലീസ് ഓഫിസർ കെ.എ. അനീഷ് എന്നിവരും പ്രതിയെ പിടികൂടിയ സംഘത്തിലുണ്ടായി. ചിത്രം : വാഹന മോഷണക്കേസിൽ പിടിയിലായ ദാമോദരൻ