കേസുകൾ നേരിടുന്ന കമ്പനികൾക്ക്​ കരാർ: പൊലീസ്​ മേധാവിയുടെ റിപ്പോർട്ടിലെ നടപടി തേടി ഹൈകോടതി

കൊച്ചി: ഒട്ടേറെ കേസുകൾ നേരിടുന്ന നിർമാണ കമ്പനികൾക്ക്​ ആലപ്പുഴയിലെ 114 പുലിമുട്ടുകളുടെ നിർമാണത്തിന്​ കരാർ നൽകിയത്​ സംബന്ധിച്ച്​ സംസ്ഥാന പൊലീസ് മേധാവി സർക്കാറിന്​ നൽകിയ റിപ്പോർട്ടിൽ എന്ത്​ നടപടി സ്വീകരിച്ചെന്ന്​ ​ഹൈകോടതി. കരാർ നൽകിയതിൽ വിജിലൻസ് അന്വേഷണം വേണമെന്നാവശ്യപ്പെട്ട്​ പെരുമ്പാവൂർ സ്വദേശി ജാഫർഖാൻ നൽകിയ ഹരജിയിലാണ്​ ജസ്റ്റിസ് കെ. ബാബുവിന്‍റെ നിർദേശം. ഹരജി വീണ്ടും പരിഗണിക്കുന്ന ജൂൺ 23ന്​ മുമ്പ്​ വിശദീകരണം നൽകാനാണ്​ നിർദേശം. ആറാട്ടുപുഴ, അമ്പലപ്പുഴ സൗത്ത്, പതിയാങ്കര, കാട്ടൂർ, വട്ടച്ചാൽ എന്നിവിടങ്ങളിലായി കിഫ്ബിയുടെ സാമ്പത്തിക സഹായത്തോടെ കേരള ഇറിഗേഷൻ ഇൻഫ്രാസ്ട്രക്‌ചർ ഡെവലപ്​മെന്റ് കോർപറേഷൻ (കെ.ഐ.ഐ.ഡി.സി) നിർമിക്കുന്ന പുലിമുട്ടുകളുടെ കരാർ രാമലിംഗം കൺസ്ട്രക്‌ഷൻ കമ്പനിയുടെയും ബംഗളൂരുവിലെ ധർത്തി ഡ്രഡ്‌ജിങ്​ ഇൻഫ്രാസ്‌ട്രക്‌ചർ ലിമിറ്റഡ് എന്ന കമ്പനിയുടെയും സംയുക്ത സംരംഭത്തിനാണ് നൽകിയത്. 2016ൽ പഴയ കറൻസി മാറാൻ ഇടനിലക്കാരനായി നിന്ന കുറ്റത്തിന് രാമലിംഗം കൺസ്ട്രക്ഷൻ കമ്പനിയുടമയെ സി.ബി.ഐ അറസ്റ്റ് ചെയ്തിരുന്നെന്ന് ഹരജയിൽ പറയുന്നു. തമിഴ്‌നാട്ടിലെ ദേശീയപാത നിർമാണ കരാർ ഇവർക്ക്​ നൽകിയതിൽ സി.ബി.ഐ അന്വേഷണം നടക്കുകയാണ്. ദേശീയ ഉൾനാടൻ ജലഗതാഗത അതോറിറ്റിയുടെ ജോലിയുമായി ബന്ധപ്പെട്ട്​ വ്യാജ ബാങ്ക് ഗാരന്റി ഹാജരാക്കിയതിനെ തുടർന്ന് ധർത്തി ഡ്രഡ്‌ജിങ്​ ഇൻഫ്രാസ്‌ട്രക്‌ചർ ലിമിറ്റഡിനെ ഡീബാർ ചെയ്തിരുന്നെന്നും ഹരജിയിൽ ആരോപിക്കുന്നു. ഇക്കാര്യങ്ങൾ ചൂണ്ടിക്കാട്ടി വിജിലൻസിനും സംസ്ഥാന പൊലീസ് മേധാവിക്കും പരാതി നൽകിയെങ്കിലും നടപടിയുണ്ടായില്ലെന്നാണ് ഹരജിയിലെ പരാതി. എന്നാൽ, സംസ്ഥാന പൊലീസ് മേധാവിക്ക്​ നൽകിയ പരാതിയിൽ ആലപ്പുഴ ജില്ല പൊലീസ് മേധാവിയോട്​ റിപ്പോർട്ട് തേടിയെന്നും അമ്പലപ്പുഴ ഡിവൈ.എസ്.പി അന്വേഷണം നടത്തി റിപ്പോർട്ട് നൽകിയിരുന്നെന്നും പൊലീസ് ഹെഡ്‌ക്വാട്ടേഴ്‌സ് അസി. ഇൻസ്‌പെക്‌ടർ ജനറൽ വിശദീകരണ പത്രികയിൽ അറിയിച്ചു. കരാർ വിവരങ്ങൾ തേടി രാമലിംഗം കൺസ്ട്രക്ഷൻ കമ്പനിയെ സമീപിച്ചെങ്കിലും കെ.ഐ.ഐ.ഡി.സിയുടെ അനുമതിയില്ലാതെ നൽകാനാവില്ലെന്നാണ് മറുപടി നൽകിയത്​. ഈ സാഹചര്യത്തിൽ വിജിലൻസ് അന്വേഷണമാണ് ഉചിതമെന്നും റിപ്പോർട്ടിൽ പറയുന്നു. സർക്കാറാണ് വിജിലൻസ് അന്വേഷണത്തിന്റെ കാര്യത്തിൽ തീരുമാനമെടുക്കേണ്ടതെന്നും ഉചിതമായ നടപടിക്ക് റിപ്പോർട്ട് ഉൾപ്പെടെ സർക്കാറിന് കൈമാറിയെന്നും അസി. ഐ.ജിയുടെ വിശദീകരണത്തിൽ പറയുന്നു. ഈ റിപ്പോർട്ടിൻമേലുള്ള നടപടി സംബന്ധിച്ച വിശദീകരണമാണ്​ കോടതി ആവശ്യപ്പെട്ടിരിക്കുന്നത്​.