ഇരുചക്ര വാഹനാപകടങ്ങളിൽ നാലുപേർക്ക് പരിക്ക് 

ആലുവ: വിവിധ സ്ഥലങ്ങളിലുണ്ടായ വാഹനാപകടങ്ങളിൽ ഇരുചക്ര വാഹന യാത്രക്കാരായ നാലുപേർക്ക് പരിക്കേറ്റു. ശ്രീമൂലനഗരം സബ് രജിസ്ട്രാർ ഓഫിസിന് സമീപം അമിതവേഗത്തിൽവന്ന കാറിടിച്ച് സ്കൂട്ടർ യാത്രികക്ക്​ പരിക്കേറ്റു. ശ്രീമൂലനഗരം പുതുവാൻകുന്നിൽ പരീതിന്‍റെ ഭാര്യ ലൈലക്കാണ് (50) പരിക്കേറ്റത്. മാറമ്പിള്ളി ഗവ. ഹെൽത്ത് സെന്‍ററിലെ നഴ്സിങ് അസിസ്റ്റന്‍റാണ് ലൈല. കടുങ്ങല്ലൂരിൽ സഹോദരങ്ങൾ സഞ്ചരിച്ച സ്കൂട്ടർ മറിഞ്ഞ് ഇരുവർക്കും പരിക്കേറ്റു. ഈസ്റ്റ് കടുങ്ങല്ലൂർ, ഇരുമ്പാപുറത്ത് വീട്ടിൽ നാരായണപിള്ള (72 ),സഹോദരി നളിനാക്ഷിയമ്മ (68) എന്നിവർക്കാണ് പരിക്കേറ്റത്. അമ്പാട്ട് കാവിൽ ബ്രേക്ക് പിടിച്ചതിനെ തുടർന്ന് ബൈക്ക് മറിഞ്ഞ് ഗോതുരുത്ത് കല്ലിങ്ങൽ വീട്ടിൽ ജോളി മകൻ ജെബിൻ ജോസഫിന് (38) പരിക്കേറ്റു. പരിക്കേറ്റവരെ ആലുവ നജാത്ത് ആശുപത്രിയിൽ പ്രവേശിപ്പിച്ചു.