ഒമിക്രോൺ ഭീഷണി; ജില്ലയിൽ അതിജാഗ്രത

കൊച്ചി: കർണാടകയിൽ ഒമിക്രോൺ റിപ്പോർട്ട് ചെയ്ത സാഹചര്യത്തിൽ ജില്ലയിൽ അതിജാഗ്രത നിർദേശം. അതിതീവ്ര വ്യാപനശേഷിയുള്ള കോവിഡ് വകഭേദമായ ഒമിക്രോണിനെ ഒരളവുവരെ പ്രതിരോധിക്കാൻ എല്ലാവരു​ം വാക്​സിനെടുക്കണമെന്ന്​ ​ആരോഗ്യവകുപ്പ്​ നിർദേശിച്ചു. നെട​ുമ്പശ്ശേരി എയർപോർട്ടിൽ യാത്രക്കാരെ നിരീക്ഷിക്കാൻ പ്രത്യേക നിരീക്ഷണ കേന്ദ്രങ്ങൾ ത​ുറന്നു. അതേസമയം ജില്ലയിൽ വാക്​സിനേഷൻ പ്രവൃത്തികൾ കൂടുതൽ ഊർജിതമാക്കാനുള്ള ശ്രമങ്ങളും ആരോഗ്യവകുപ്പ്​ ആരംഭിച്ചു. ജില്ലയിൽ ഇതുവരെയുള്ള കണക്കനുസരിച്ച് രണ്ട്​ ഡോസ് വാക്സിൻ സ്വീകരിച്ചവർ 28,76690 പേരാണ്. ആദ്യ ഡോസ് സ്വീകരിച്ചവരിൽ 79.05 ശതമാനം പേർ സെക്കൻഡ്​​ ഡോസ് സ്വീകരിച്ചുകഴിഞ്ഞു. വാക്സിനെടുക്കാനുള്ള വിമുഖത രോഗവ്യാപന സാധ്യതക്കൊപ്പം ഗുരുതരാവസ്ഥയിലേക്കെത്താനും മരണം സംഭവിക്കാനും കാരണമാകും. വാക്സിനെടുക്കാതെ വിട്ടുനിൽക്കുന്നവർ എത്രയുംപെട്ടന്ന് എടുക്കണമെന്നും ആരോഗ്യവകുപ്പ്​ നിർദേശിച്ചു. രോഗങ്ങൾ, അലർജി എന്നിവകൊണ്ട് വാക്സിനെടുക്കാൻ സാധിക്കാത്തവർ സർക്കാർ ഡോക്ടറുടെ സർട്ടിഫിക്കറ്റ് ഹാജരാക്കണം. മാസ്കും കൈകളുടെ ശുചിത്വവും സമൂഹ അകലവും പാലിക്കുന്നത്​ തുടർന്നാലേ​ ഒമിക്രോൺ ഭീഷണി ഫലപ്രദമായി നേരിടാൻ സാധിക്കുകയുള്ളൂവെന്നും ജില്ല മെഡിക്കൽ ഓഫിസർ അറിയിച്ചു.