‍‍‍കാണാതായ കോളജ് അധ്യാപകൻ കോയമ്പത്തൂരിൽ തൂങ്ങിമരിച്ച നിലയില്‍

‍‍‍‍ ‍‍‍പെരുമ്പാവൂർ: ദുരൂഹ സാഹചര്യത്തില്‍ കാണാതായ കോളജ് അധ്യാപകനെ കോയമ്പത്തൂരിലെ കാരമടയിൽ ലോഡ്ജിൽ തൂങ്ങിമരിച്ച നിലയില്‍ കണ്ടെത്തി. പല്ലാരിമംഗലം അടിവാട് വലിയപറമ്പില്‍ വീട്ടിൽ പരേതനായ അബ്ദുല്‍സലാമിന്റെ മകൻ വി.എ. അബൂതാഹിറാണ് (28) മരിച്ചത്. മേതല ഐ.എല്‍.എം കോളജില്‍ അസിസ്റ്റന്‍റ്​ പ്രഫസറായിരുന്നു. കഴിഞ്ഞ വെള്ളിയാഴ്ച മുതലാണ് കാണാതായത്. വെള്ളിയാഴ്ച ഉച്ചക്ക് പള്ളിയിലേക്കെന്നുപറഞ്ഞാണ് ബൈക്കിൽ കോളജിൽനിന്ന് പോയതെന്ന ബന്ധുക്കളുടെ പരാതിയിൽ കുറുപ്പംപടി പൊലീസ് അന്വേഷണം നടത്തിവരുകയായിരുന്നു. ആത്മഹത്യ ചെയ്യാനുള്ള കാരണം വ്യക്തമല്ല. കോയമ്പത്തൂരിൽ എത്തിയ കുറുപ്പംപടി പൊലീസ് അന്വേഷണം നടത്തുന്നുണ്ട്​. ബൈക്കിൽ ഒറ്റക്ക് സഞ്ചരിക്കുന്നതിന്റെ ഇരുപത്തഞ്ചോളം സി.സി ടി.വി ദൃശ്യങ്ങൾ പൊലീസ് കണ്ടെത്തിയിട്ടുണ്ട്. ഇൻക്വസ്റ്റ് നടപടികൾ പൂർത്തിയാക്കി മൃതദേഹം വ്യാഴാഴ്ച നാട്ടിൽ എത്തിക്കുമെന്നാണ് വിവരം. മാതാവ്: സുബൈദ. ഭാര്യ: സ്വാലിഹ. മകള്‍: അയാന (ആറുമാസം). ekd abuthahir 28 pbvr 1