പി.സി. ജോർജിന്‍റെ അറസ്റ്റ് ഇരട്ടത്താപ്പെന്ന്​ വിശ്വഹിന്ദു പരിഷത്ത്

കൊച്ചി: പി.സി. ജോർജി​ന്‍റെ അറസ്റ്റ് സർക്കാറിന്‍റെ അമിതോത്സാഹവും ഹൈന്ദവ സമൂഹത്തോടുള്ള വെല്ലുവിളിയുമാ​ണെന്ന് വിശ്വഹിന്ദു പരിഷത്ത്. കൊടും ക്രിമിനലിനെപ്പോലെ അറസ്റ്റ് ചെയ്തതിനു പിന്നിൽ ഉന്നതതല ഗൂഢാലോചനയുണ്ടെന്ന്​ സംസ്ഥാന പ്രസിഡൻറ് വിജി തമ്പിയും ജനറൽ സെക്രട്ടറി വി.ആർ. രാജശേഖരനും പ്രസ്താവനയിൽ പറഞ്ഞു. ഇതിനെതിരെ വിശ്വഹിന്ദു പരിഷത്ത് പ്രക്ഷോഭവും നിയമപോരാട്ടവും നടത്തും. അറസ്റ്റ് സ്വാഗതാർഹം -ജനാധിപത്യ രാഷ്ട്രീയ പ്രസ്ഥാനം കൊച്ചി: പി.സി. ജോർജിനെതിരെ കേസെടുത്ത സർക്കാർ നടപടിയെ ജനാധിപത്യ രാഷ്ട്രീയ പ്രസ്ഥാനം സ്വാഗതം ചെയ്തു. എന്നാൽ, ഗുരുതരമായ ഒരു കുറ്റകൃത്യത്തിൽ ജാമ്യം അനുവദിച്ചത് നിർഭാഗ്യകരമാണ്. ജോർജ് നേരത്തെയും മുസ്​ലിംകൾക്കും ദലിതർക്കും സ്ത്രീകൾക്കുമെതിരെ ഹീനമായ ആരോപണങ്ങൾ ഉന്നയിച്ചിട്ടുണ്ട്. മതസ്പർധ സൃഷ്ടിക്കാൻ ശ്രമിക്കുന്നവർ എത്ര ഉന്നതരായാലും കർശന നിയമനടപടി സ്വീകരിക്കണമെന്ന് പ്രസിഡന്‍റ്​ കെ.വി. ഭദ്രകുമാരി, ജനറൽ സെക്രട്ടറി സണ്ണി എം. കപിക്കാട്, സംഘടന സെക്രട്ടറി പി.ജെ. തോമസ് എന്നിവർ ആവശ്യപ്പെട്ടു.