കെ.എസ്.ആർ.ടി.സി ഡ്രൈവറെ മർദിച്ച യുവാവ് പിടിയിൽ

കളമശ്ശേരി: കെ.എസ്.ആർ.ടി.സി ബസ് ഡ്രൈവറെ മർദിച്ച യുവാവ് പിടിയിൽ. എറണാകുളം സൗത്ത് ചിറ്റൂർ കല്ലിങ്ങൽ വീട്ടിൽ കെ.വി. അരുണാണ് (26) അറസ്റ്റിലായത്. ഞായറാഴ്ച രാത്രിയാണ് കേസിനാസ്പദമായ സംഭവം. തൃശൂർ-തിരുവനന്തപുരം റൂട്ടിലോടുന്ന ബസ്, കൊരട്ടി ഭാഗത്തുവെച്ച് ബൈക്കിൽ ഉരസിയിട്ട് നിർത്താതെ പോയി.

ഇതോടെ ബസിനെ പിന്തുടർന്ന് കളമശ്ശേരി പ്രീമിയർ ജങ്ഷനിൽ തടഞ്ഞുനിർത്തി ഡ്രൈവറെ അസഭ്യം പറയുകയും മർദിക്കുകയുമായിരുന്നു. ഡ്രൈവറുടെ പരാതിയിൽ കളമശ്ശേരി സി.ഐ സന്തോഷിന്‍റെ നേതൃത്വത്തിലുള്ള സംഘമാണ് പ്രതിയെ അറസ്റ്റ് ചെയ്തത്.