എടയാർ അഗ്നിബാധക്ക് കാരണം ഇടിമിന്നലെന്ന് സൂചന

ആലുവ: എടയാർ വ്യവസായ മേഖലയിലുണ്ടായ അഗ്​നിബാധക്ക് കാരണം ഇടിമിന്നലെന്ന് സൂചന. നാല് കമ്പനികളിലാണ് തീപിടിത്തമുണ്ടായത്. ശനിയാഴ്ച രാത്രിയും ഞായറാഴ്ച പുലർച്ചയുമായാണ് ഇടിമിന്നലുണ്ടായത്. തുടർന്നാണ് എടയാർ ഓറിയോൺ കെമിക്കൽസ്, ജനറൽ കെമിക്കൽസ്, ശ്രീകോവിൽ റബർ യൂനിറ്റ്, സി.ജി ലൂബ്രിക്കൻറ് സ്ഥാപനങ്ങൾ അഗ്​നിക്കിരയായത്.

ശക്തമായ ഇടിമിന്നലിൽ വൈദ്യുതി കമ്പികൾ തമ്മിൽ ഉരസിയാണ് അഗ്​നിബാധ ഉണ്ടായതെന്നാണ് പറയപ്പെടുന്നത്. എറണാകുളം, തൃശൂർ, കോട്ടയം, ആലപ്പുഴ ജില്ലകളിൽനിന്നുള്ള ഇരുപ​ത്തഞ്ചോളം അഗ്‌നിരക്ഷ യൂനിറ്റുകൾ മണിക്കൂറുകളോളം പരിശ്രമിച്ചാണ് തീയണച്ചത്.

നാല് കമ്പനികളിലായി 1.65 കോടി രൂപയുടെ നഷ്​ടം സംഭവിച്ചതായാണ് പ്രാഥമിക നിഗമനം. വ്യവസായ വകുപ്പ് അധികൃതർ കണ്ടെത്തിയത് ഈ തുകക്കുള്ള നഷ്​ടമാണ്.