പ്രേതാലയമായി ആർ.ഡി.ഒ ക്വാർ​േട്ടഴ്​സ്​

മൂവാറ്റുപുഴ: മൂവാറ്റുപുഴ ആർ.ഡി.ഒ ആയിരുന്ന സന്തോഷി​െൻറ ദുരൂഹമരണത്തിനു​ കാൽനൂറ്റാണ്ട്​ പിന്നിടുമ്പോഴും ആർ.ഡി.ഒ ക്വാർട്ടേഴ്സ് താമസിക്കാൻ ആളില്ലാതെ അനാഥമായി കിടക്കുന്നു. നഗരത്തിലെ എൻ.ജി.ഒ ക്വാർട്ടേഴ്സിനു സമീപം മുറിക്കല്ല് ബൈപാസിലാണ് പ്രേതാലയമായി ഇത്​ അടഞ്ഞുകിടക്കുന്നത്.

സന്തോഷി​െൻറ മരണത്തിനു ശേഷം ക്വാർട്ടേഴ്സിൽ താമസിക്കാൻ ആരും എത്തിയിട്ടില്ല. ഇവിടെ താമസിക്കാൻ ഒരു വനിത ഉദ്യോഗസ്ഥ തയാറായെത്തിയെങ്കിലും ഒരു ദിവസം മാത്രമാണ്​ കഴിഞ്ഞത്. പിന്നീട് പലരും സന്നദ്ധത അറിയിച്ചെങ്കിലും അവസാന നിമിഷം ഒഴിഞ്ഞുമാറുകയായിരുന്നു. കാടുപിടിച്ച് കിടക്കുന്ന ഇവിടേക്ക് ആരും തിരിഞ്ഞുനോക്കാറുമില്ല.

ഇഴജന്തുക്കളുടെ താവളമാണ് ഇന്ന് ക്വാർട്ടേഴ്സ്. ഇവിടെ സാംസ്കാരിക നിലയം നിർമിക്കാനും മിനി സ്​റ്റേഡിയം നിർമിക്കാനുമൊക്കെ പദ്ധതി തയാറാക്കി പ്രവർത്തനം ആരംഭി​െച്ചങ്കിലും തുടർനടപടി ഉണ്ടായില്ല. 1995 മേയ് 20നാണ് കേരളത്തെ ഞെട്ടിച്ച്​ മൂവാറ്റുപുഴ ആർ.ഡി.ഒ ആയിരുന്ന സന്തോഷി​െൻറ അഴുകിയ മൃതദേഹം ആർ.ഡി.ഒ ക്വാർട്ടേഴ്സിൽ കണ്ടെത്തിയത്. മൃതദേഹത്തിനു മൂന്നുദിവസത്തെ പഴക്കമുണ്ടായിരുന്നു. മരണം കൊലപാതകമാണെന്നും ആത്മഹത്യയാണെന്നും ഹൃദയസ്തംഭനം മൂലമുള്ള സ്വാഭാവിക മരണമാണെന്നുമൊക്കെ വിശദീകരണങ്ങളും അനുബന്ധ കഥകളും പ്രചരിച്ചു. നിരവധി സംഘങ്ങൾ അന്വേഷിച്ചു.

സന്തോഷി​െൻറ അമ്മ നടത്തിയ പ്രക്ഷോഭങ്ങൾക്കൊടുവിൽ സി.ബി.ഐയും കേസ് അന്വേഷിച്ചു.

കൊലപാതകമാണെന്നും ആത്മഹത്യയാണെന്നും അന്വേഷണ സംഘങ്ങൾ പലവിധ നിഗമനങ്ങളിലുമെത്തി. എന്നാൽ, വിശ്വസനീയമായ വിധത്തിലുള്ള റിപ്പോർട്ട് ആരിൽനിന്നുമുണ്ടായില്ല. സന്തോഷി​െൻറ മരണത്തിന്​ 25 വർഷം പിന്നിടുമ്പോഴും ക്വാർട്ടേഴ്സ് പ്രേതഭവനമായി തുടരുകയാണ്.