റോഡ് തകര്‍ന്ന സംഭവം: നിര്‍മാണത്തിലെ അപാകതയെന്ന് ആരോപണം

പുഴയില്‍നിന്ന്​ വന്‍തോതില്‍ പാറഖനനം നടത്തിയിരുന്നു അടിമാലി: അടിമാലി - കുമളി ദേശീയപാതയില്‍ പനംകുട്ടി പുതിയപാലത്തിന് താഴെ റോഡ് ഇടിഞ്ഞ് പുഴയില്‍ പതിച്ചതിന്​ പിന്നിൽ നിര്‍മാണത്തിലെ അപാകതയെന്ന് ആരോപണം. 2018 ലെ പ്രളയത്തിൽ ഇവിടെ റോഡ് ഇടിഞ്ഞ് പുഴയിൽ പതിച്ചിരുന്നു. ആഴ്ചകളോളം ഗതാഗതം മുടങ്ങിയ പാതയില്‍ നിർമാണ പ്രവർത്തനങ്ങൾ മാസങ്ങൾ നീണ്ടു. ടൈല്‍ വിരിച്ചാണ് റോഡ്​ നിര്‍മ്മാണം പൂര്‍ത്തിയാക്കിയത്. 2020-21 ല്‍ വീണ്ടും ഈ ഭാഗത്ത് അറ്റകുറ്റപ്പണിയുടെ മറവില്‍ പുഴയില്‍നിന്ന്​ വന്‍തോതില്‍ പാറഖനനം നടത്തുകയുണ്ടായി. തുടർന്ന്​, പുഴയുടെ ഒഴുക്ക് തടസ്സപ്പെടുകയും ജലനിരപ്പ് ഉയരുമ്പോള്‍ വെള്ളം റോഡിലേക്ക് ഇരച്ചുകയറുന്ന സ്ഥിതിവിശേഷം ഉണ്ടാകുകയും ചെയ്തു. പുഴയിലെ വെള്ളം ദിശമാറി ഒഴുകിയതാണ് കോടികള്‍ ചെലവഴിച്ച്​ നിർമിച്ച റോഡ് ഇപ്പോള്‍ തകരാന്‍ കാരണമെന്നാണ് ആരോപണം. വ്യാഴാഴ്ച വൈകീട്ട് റോഡിന്റെ മധ്യഭാഗം മുതല്‍ 75 മീറ്ററോളം ഇടിഞ്ഞ് പുഴയില്‍ പതിക്കുകയായിരുന്നു. ഇതോടെ ഈ പാതയില്‍ ഗതാഗതം മുടങ്ങിയിരിക്കുകയാണ്​.