വാഴവര അർബൻ പി.എച്ച്‌.സി കെട്ടിടനിർമാണം ഇഴയുന്നു

കട്ടപ്പന: വാഴവരയിലെ അർബൻ പി.എച്ച്‌.സിയുടെ കെട്ടിടനിർമാണം ഈഴയുന്നു. കട്ടപ്പന നഗരസഭയുടെ ഉടമസ്ഥതയിൽ വാഴവരയിലെ 60 സൻെറിൽനിന്ന് 18 സൻെറിലാണ്​ അർബൻ പി.എച്ച്.സിക്കായി കെട്ടിടം നിർമിക്കുന്നത്. 2020 മാർച്ച് ഏഴിന്​ ശിലാസ്ഥാപനം നടത്തിയ കെട്ടിടത്തി‍ൻെറ മേൽക്കൂരയുടെ നിർമാണംപോലും ഇതുവരെ പൂർത്തിയായിട്ടില്ല. എം.എൽ.എ ഫണ്ടിൽനിന്ന് 30 ലക്ഷം രൂപ റോഷി അഗസ്​റ്റിൻ അനുവദിച്ചാണ് ആദ്യഘട്ട പണി നടത്തിയത്. നഗരസഭയിൽനിന്ന് 10 ലക്ഷം രൂപ അനുവദിച്ചിരുന്നു. ഈ തുക വിനിയോഗിച്ച് കെട്ടിടത്തി​ൻെറ വാർക്ക ഉൾപ്പെടെ പൂർത്തിയാക്കാനാണ് ലക്ഷ്യമിടുന്നത്. അതിനുശേഷമുള്ള പണിക്കായി നഗരസഭയിൽനിന്ന് കൂടുതൽ ഫണ്ട് വകയിരുത്തിയിട്ടുണ്ട്. എന്നാൽ, നിലവിലെ പണി പൂർത്തിയാക്കിയെങ്കിൽ മാത്രമേ കൂടുതലായി വകയിരുത്തിയ ഫണ്ട് ഉപയോഗപ്പെടുത്താനാകൂ. ഹെൽത്ത്മിഷനിൽനിന്ന് അനുവദിച്ച ഏഴ്​ കമ്പ്യൂട്ടറുകൾ പി.എച്ച്‌.സിയിൽ എത്തിച്ചിട്ടുണ്ടെങ്കിലും സ്ഥാപിക്കാൻ സൗകര്യമില്ല. പുതിയ കെട്ടിടം പൂർത്തിയാക്കിയെങ്കിൽ മാത്രമേ കമ്പ്യൂട്ടറുകൾ സ്ഥാപിക്കാനാവൂ. -------- ജീവനക്കാരുമില്ല പി.എച്ച്​.സിയിൽ ജീവനക്കാരുടെ കുറവും ആശുപത്രിയുടെ പ്രവർത്തനത്തെ ബാധിക്കുന്നുണ്ട്. ലാബ് ടെക്‌നീഷ്യൻ, സ്​റ്റാഫ്​ നഴ്‌സ്, ഡേറ്റ എൻട്രി ഓപറേറ്റർ എന്നീ തസ്​തികകൾ ഒഴിഞ്ഞുകിടക്കുകയാണ്. ലാബോറട്ടറിയിലെ പരിശോധനകളും വാക്‌സിനേഷനും രണ്ടാഴ്​ചയായി മുടങ്ങിയ നിലയിലാണ്. ഇപ്പോൾ വാഴവര വാകപ്പടയിലെ വാടക കെട്ടിടത്തിലാണ് പി.എച്ച്.സി പ്രവർത്തിക്കുന്നത്. അടിയന്തരമായി കെട്ടിട നിർമാണം പൂർത്തിയാക്കി ജീവനക്കാരുടെ കുറവ് പരിഹരിച്ച്​ ആശുപത്രി ജനങ്ങൾക്ക് ഉപകരിക്കുന്ന വിധം പ്രവർത്തനം കാര്യക്ഷമമാക്കണമെന്നാണ് ജനങ്ങളുടെ ആവിശ്യം. ----------- ഫോട്ടോ. നിർമാണം ഇഴയുന്ന വാഴവര അർബൻ പി.എച്ച്​.സി