ഭിന്നശേഷിക്കാർക്ക്​ ഏകീകൃത കാർഡ്​: ജില്ലയും ഒരുങ്ങുന്നു

തൊടുപുഴ: എല്ലാ ഭിന്നശേഷിക്കാർക്കും ഏകീകൃത തിരിച്ചറിയൽ കാർഡ്​ (യൂനിഫൈഡ്​ ഡിസെബിലിറ്റി ഐഡന്‍റി​ഫിക്കേഷൻ കാർഡ്) ലഭ്യമാക്കാനുള്ള നടപടികൾക്ക്​ ജില്ലയിലും തുടക്കമാകുന്നു. ഇതിനായി ജില്ലയിലെ എല്ലാ നിയോജകമണ്ഡലങ്ങളിലും സ്​പെഷൽ ഡ്രൈവ്​ സംഘടിപ്പിക്കാൻ ബുധനാഴ്ച ചേർന്ന ജില്ലതല ഉദ്യോഗസ്ഥരുടെ യോഗം തീരുമാനിച്ചു. കലക്ടറുടെ നേതൃത്വത്തിൽ സ്​പെഷൽ ഡ്രൈവ്​ ഒരാഴ്ചക്കകം ആരംഭിക്കും. നിലവിൽ ജില്ലതല മെഡിക്കൽ ബോർഡ്​ നൽകുന്ന സർട്ടിഫിക്കറ്റാണ്​ വൈകല്യം തെളിയിക്കാൻ ഭിന്നശേഷിക്കാർ ആധികാരിക രേഖയായി ഉപയോഗിക്കുന്നത്​. ഇതിന്​ പകരമാണ്​ ആധാർ മാതൃകയിൽ ഏകീകൃത തിരിച്ചറിയൽ കാർഡ്​ കൊണ്ടുവരുന്നത്​. രാജ്യത്തൊട്ടാകെ നടപ്പാക്കുന്ന പദ്ധതിയുടെ ജില്ലയിലെ പ്രവർത്തനങ്ങൾ ഊർജിതമാക്കാനും ഒരു മാസത്തിനകം എല്ലാ ഭിന്നശേഷിക്കാർക്കും കാർഡ്​ ലഭ്യമാക്കാനുമാണ്​ തീരുമാനം. സ്വന്തം നിലയിൽ അപേക്ഷിച്ച്​ കാർഡ്​ സ്വന്തമാക്കിയ ഭിന്നശേഷിക്കാർ ജില്ലയിലുണ്ട്​. എന്നാൽ, ഇവരുടെ എണ്ണം വളരെ കുറവാണ്​. എല്ലാവർക്കും കാർഡിന്‍റെ പ്രയോജനം ഉറപ്പാക്കുകയാണ്​ സ്​പെഷൽ ഡ്രൈവിന്‍റെ ലക്ഷ്യമെന്ന്​ ജില്ല സാമൂഹികനീതി ഓഫിസർ വി.ജെ. ബിനോയി പറഞ്ഞു. ജില്ലയിൽ 26,262 ഭിന്നശേഷിക്കാർ ഉണ്ടെന്നാണ്​ കണക്ക്​. ഒരാഴ്ചക്കകം നിയോജകമണ്ഡലം അടിസ്ഥാനത്തിൽ കാർഡ്​ ലഭിക്കാനുള്ള ഭിന്നശേഷിക്കാരുടെ കണക്കെടുത്ത ശേഷം പ്രത്യേകം ക്യാമ്പുകൾ സംഘടിപ്പിച്ച്​ വിതരണം ചെയ്യാനാണ്​ പദ്ധതി​. ഇതിനായി തദ്ദേശ സ്ഥാപനങ്ങളുടെ സഹകരണവും ഉറപ്പാക്കിയിട്ടുണ്ട്​. ഭിന്നശേഷിക്കാർക്ക്​ അക്ഷയകേന്ദ്രങ്ങൾ വഴി ഓൺലൈനായി അപേക്ഷിച്ച്​ കാർഡ്​ സ്വന്തമാക്കാനുള്ള സൗകര്യം സാമൂഹികനീതി വകുപ്പ്​ ഒരുക്കിയിരുന്നു. ജില്ല മെഡിക്കൽ ഓഫിസറുടെ ഓഫിസിൽ ലഭിക്കുന്ന ഓൺലൈൻ അപേക്ഷകളിൽ അപേക്ഷകനെ വിളിച്ചുവരുത്തി രേഖകളും ഭിന്നശേഷിയും പരിശോധിച്ച്​ അംഗീകാരം ലഭിച്ചുകഴിഞ്ഞാൽ കാർഡ്​ ഓൺലൈനായി ഡൗൺലോഡ്​ ചെയ്ത്​ എടുക്കാവുന്ന വിധത്തിലാണ്​ സംവിധാനം. box യു.ഡി.ഐ.ഡി കാർഡ്​ * ഭിന്നശേഷിക്കാരെ തിരിച്ചറിയുന്നതിനൊപ്പം അവരുടെ വൈകല്യങ്ങളുടെ വിശദാംശങ്ങൾ പൂർണമായും ഉൾക്കൊള്ളുന്നതാണ്​ ഏകീകൃത തിരിച്ചറിയൽ കാർഡ്​. * കാർഡ്​ ഉടമകൾ വൈകല്യം തെളിയിക്കുന്ന ഒന്നിലധികം രേഖകൾ കൈവശം കൊണ്ടുനടക്കുകയോ പകർപ്പുകൾ സൂക്ഷിക്കുകയോ ചെയ്യേണ്ടതില്ല. തങ്ങളെ സംബന്ധിച്ച എല്ലാ വിശദാംശങ്ങളും ലഭ്യമായ കാർഡ്​ വിവിധ ആവശ്യങ്ങൾക്ക്​ ഒറ്റ ആധികാരിക രേഖയായി ഉപയോഗിക്കാം. * ഭിന്നശേഷിക്കാർക്ക്​ സർക്കാർ നൽകുന്ന വിവിധ ആനുകൂല്യങ്ങൾ ലഭിക്കാൻ​ തിരിച്ചറിയൽ, വേരിഫിക്കേഷൻ എന്നീ ആവശ്യങ്ങൾക്കുള്ള ഏക രേഖയായിരിക്കും യു.ഡി.ഐ.ഡി കാർഡ്​.