ലൈഫ് ഭവന പദ്ധതി: പട്ടിക വൈകുന്നു

നെടുങ്കണ്ടം: ഭവനരഹിതരായ ആയിരക്കണക്കിന് ആളുകള്‍ ലൈഫ് ഭവന നിർമാണ പദ്ധതിയില്‍ അപേക്ഷ സമര്‍പ്പിച്ച് രണ്ടു​ വര്‍ഷമായിട്ടും പഞ്ചായത്തുകളില്‍ അന്തിമലിസ്റ്റ് പ്രസിദ്ധീകരിച്ചിട്ടില്ല. ഉദ്യോഗസ്ഥതലത്തിലുള്ള പരിശോധന രണ്ടുഘട്ടമായി നടന്നിട്ടും ലിസ്റ്റ് വൈകുന്നതില്‍ ദുരൂഹതയുള്ളതായാണ് ആരോപണം. ഇതോടെ ഭവനരഹിതരായ പാവപ്പെട്ട ജനങ്ങള്‍ക്ക് സുരക്ഷിതമായി അന്തിയുറങ്ങാന്‍ ഈ മഴക്കാലത്തും കഴിയില്ല എന്നതാണ്​ സ്ഥിതി. പട്ടിക വൈകുന്നത് സര്‍ക്കാറിന്‍റെ അലംഭാവം മൂലമാണെന്ന്​ കേരള കോണ്‍ഗ്രസ് ഉടുമ്പന്‍ചോല നിയോജക മണ്ഡലം കമ്മിറ്റി ആരോപിച്ചു. ജനങ്ങള്‍ക്ക് ആവശ്യമില്ലാത്തതും താൽപര്യമില്ലാത്തതുമായ കെ-റെയില്‍പോലുള്ള പദ്ധതികള്‍ക്കുവേണ്ടി കല്ലിടുന്നതിനും പൊലീസിനെ വിന്യസിക്കുന്നതിനുമായി ലക്ഷങ്ങള്‍ ചെലവാക്കുന്ന സര്‍ക്കാര്‍ ഭവനരഹിതരെ മറന്നുപോകുന്നത്​ പ്രതിഷേധാര്‍ഹമാണെന്നും യോഗം കുറ്റപ്പെടുത്തി. നിയോജക മണ്ഡലം പ്രസിഡന്‍റ്​ ജോജി ഇടപ്പള്ളിക്കുന്നേല്‍ അധ്യക്ഷത വഹിച്ചു. ജോസ് പൊട്ടംപ്ലാക്കല്‍, ബേബി പതിപ്പള്ളി, ഒ.ടി. ജോണ്‍, എം.ജെ. കുര്യന്‍, ടി.വി. ജോസുകുട്ടി, ജോയി കണിയാംപറമ്പില്‍, ബിജു ആക്കാട്ടുമുണ്ട, സിബി കൊച്ചുവള്ളാട്ട്, തോമസ് കടൂത്താഴെ, സണ്ണി പട്ട്യാലില്‍, ഫിലിപ്പ് കലയത്തുംകുഴി, ജോയി നമ്പുടാകത്ത് തുടങ്ങിയവർ സംസാരിച്ചു.