കൃഷിയിടത്തിലെ കിണറ്റിൽ വീണ 12 കാട്ടുപന്നിക്കുഞ്ഞുങ്ങളെ കൊന്ന് കുഴിച്ചുമൂടി

കട്ടപ്പന: കൃഷിയിടത്തിലെ കിണറ്റിൽ വീണ നിലയിൽ കണ്ടെത്തിയ 12 കാട്ടുപന്നിക്കുഞ്ഞുങ്ങളെ കൊന്ന് കുഴിച്ചുമൂടി. കട്ടപ്പന നരിയമ്പാറ ഏഴിലക്കുന്നേൽ ജോസിന്റെ കൃഷിയിടത്തിലെ ഉപയോഗശൂന്യമായ കിണറ്റിലാണ്​ പന്നിക്കുഞ്ഞുങ്ങൾ വീണത്​. തള്ളയും കുഞ്ഞുങ്ങളും ഒരുമിച്ച്​ പോകുന്നതിനിടെ വീണതാകാമെന്ന്​ സംശയിക്കുന്നു. വീട്ടുകാർ വിവരമറിയിച്ചതിനെ തുടർന്ന് വനം വകുപ്പ്​ അധികൃതർ സ്ഥലത്തെത്തി ഇവയെ കൊന്ന് കുഴിച്ചുമൂടുകയായിരുന്നു. കൃഷിയിടത്തിൽ എത്തുന്ന കാട്ടുപന്നികളെ കൊല്ലാൻ അനുമതിയുള്ളതിനാലാണ് ഇവയെ കൊന്നത്. തുടർന്ന് മണ്ണെണ്ണ ഒഴിച്ച് ഇറച്ചി ഉപയോഗശൂന്യമാക്കിയ ശേഷം കുഴിച്ചുമൂടി. ബുധനാഴ്ച രാവിലെ കൃഷിയിടത്തിൽ പുല്ല് ചെത്താൻ പോയവരാണ് കിണറ്റിൽ പന്നിക്കുഞ്ഞുങ്ങളെ കണ്ടെത്തിയത്. പ്രദേശത്ത്​ അടുത്ത നാളിൽ കാട്ടുപന്നിശല്യം വർധിച്ചിട്ടുണ്ട്​.