സാമൂഹികവിരുദ്ധരുടെ ആക്രമണത്തിൽ ജനയുഗം ലേഖകന് പരിക്ക്​​

തൊടുപുഴ: ജനയുഗം ജില്ല ലേഖകനുനേരെ സാമൂഹിക വിരുദ്ധ സംഘത്തി​െൻറ ആക്രമണം. തലക്ക്​ ഗുരുതര പരിക്കേറ്റ ലേഖകൻ ജോമോൻ വി.സേവ്യർ തൊടുപുഴയിലെ സ്വകാര്യ ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലാണ്.

തിങ്കളാഴ്ച രാത്രി പത്തോടെ ബാഡ്മിൻറൺ കളി കഴിഞ്ഞ് വീട്ടിലേക്ക് മടങ്ങുംവഴി വീടിന് സമീപം കരിമണ്ണൂർ ‍മാണിക്കുന്നേൽ പീടികക്ക്​ സമീപമാണ്​ ആക്രമണം ഉണ്ടായത്.

വാഹനം ഓവർടേക്ക്​ ചെയ്തത് സംബന്ധിച്ച് കാർ യാത്രികരും ബൈക്ക് യാത്രികരും തമ്മില്‍ സംഘർഷം നടക്കുന്നതിനിടെ ഇതുവഴി എത്തിയ ജോമോനെ ഇവർ സംഘം ചേർന്ന് ആക്രമിക്കുകയായിരുന്നു.

കരിമണ്ണൂർ പൊലിസ് സ്​റ്റേഷനിൽ പരാതിനൽകി. സംഘത്തിൽപ്പെട്ട കരിമണ്ണൂർ, വണ്ടമറ്റം സ്വദേശികളായ രണ്ടുപേരെ തിരിച്ചറിഞ്ഞിട്ടുണ്ട്. മറ്റുള്ളവരെ പൊലീസ് അന്വേഷിച്ചുവരുകയാണ്.

സംഭവത്തിൽ പ്രതികളെ മുഴുവനും നിയമത്തിന് മുന്നിൽ കൊണ്ടുവരണമെന്ന്​ സി.പി.ഐ ജില്ല സെക്രട്ടറി കെ.കെ. ശിവരാമൻ ആവശ്യപ്പെട്ടു. പരിക്കേറ്റ ജോമോനെ സി.പി.ഐ നേതാക്കളായ കെ. സലിംകുമാർ, പി.പി. ജോയി എന്നിവർ ആശുപത്രിയിൽ സന്ദർശിച്ചു.

പ്രതിഷേധിച്ചു

തൊടുപുഴ: ജനയുഗം ജില്ല ലേഖകൻ ‍ജോമോൻ വി.സേവ്യറിനെ അക്രമിച്ച സംഭവത്തിൽ പത്രപ്രവർത്തക യൂനിയൻ ജില്ല ഘടകം പ്രതിഷേധിച്ചു.

ജോമോനെ അകാരണമായി മർദിച്ച ക്രിമിനൽ സംഘത്തെ എത്രയുംവേഗം അറസ്​റ്റ്​ ചെയ്യണമെന്ന് യൂനിയൻ ജില്ല പ്രസിഡൻറ്​ എം.എൻ. സുരേഷും സെക്രട്ടറി വിനോദ് കണ്ണോളിയും ആവശ്യപ്പെട്ടു.