കൃഷിയിലൂടെ പഠനം: വേറിട്ട ആശയവുമായി കരിങ്കുന്നം ഗവ. എൽ.പി സ്കൂൾ

തൊടുപുഴ: കുട്ടി അറിയാതെ തന്നെ അവന്‍റെ അന്വേഷണം, താൽപര്യം തുടങ്ങിയ കഴിവുകളെ സർഗാത്മകമായി വിനിയോഗിക്കുവാൻ എങ്ങനെ സാധിക്കും. ഈ പരീക്ഷണത്തിലാണ്​ കരിങ്കുന്നം ഗവ.എൽ.പി സ്കൂൾ. വേറിട്ട ഈ ആശയം നടപ്പാക്കാൻ കരിങ്കുന്നം ഗ്രാമ പഞ്ചായത്തും കരിങ്കുന്നം കൃഷിഭവനും സ്കൂളിനൊപ്പമുണ്ട്​.

‘രസക്കുടുക്ക’ എന്നു പേരിട്ടിരിക്കുന്ന പഠന പരിപോഷണ പരിപാടി കൃഷി ഒരു സംസ്കാരമായി കാണുവാനും കൃഷിയിലൂടെ പ്രായോഗിക പരിഞ്ജാനവും അറിവും വർധിപ്പിക്കുവാനും കുട്ടികളെ പ്രാപ്തരാക്കുന്നതോടൊപ്പം തന്നെ വിവിധ വിഷയങ്ങളുമായി ബന്ധപ്പെടുത്തി 'കൃഷിയിലൂടെ പഠനം' എന്ന ആശയം പ്രാവർത്തികമാക്കുവാൻ സഹായിക്കുമെന്നാണ്​ പ്രതീക്ഷ.

പാഠപുസ്തകങ്ങളിലെ അറിവിനുമപ്പുറം മലയാളം, ഇംഗ്ലീഷ്​ ഭാഷയുടെ അനന്ത സാധ്യതകൾ, പ്രായോഗിക ചിന്തയെ ഉദ്ധീപിപ്പിക്കുന്ന ഗണിത പ്രശ്നങ്ങൾ, പരിഹാര പ്രവർത്തനങ്ങൾ, സർഗ്ഗാത്മക കഴിവുകളുടെ ഏകോപനം, ഉൽപ്പന്ന രൂപീകരണം എന്നിവക്കൊപ്പം പച്ചക്കറി കൃഷിയിലൂടെ സ്വയം പര്യാപ്തതയും കുട്ടികളിലെ സമ്പാദ്യശീലവും വളർത്തലും പദ്ധതിയുടെ ലക്ഷ്യമാണ്.

രസക്കുടുക്ക -അക്കാദമിക മാസ്റ്റർ പ്ലാൻ പ്രകാശനം തൊടുപുഴ ബി. ആർ. സി പ്രതിനിധി സിന്ധു രാജഗോപാൽ നിർവഹിക്കുന്നു