ഓണത്തിന് ഒരുമുറം ഇലക്കറിയുമായി വിദ്യാർഥികൾ

തൊടുപുഴ: ഓണത്തിന് ഒരുമുറം ഇലക്കറികൾ എന്ന ആ​ശയം പ്രാവർത്തികമാക്കി കരിമണ്ണൂർ സെൻറ് ജോസഫ് ഹയർ സെക്കൻഡറി സ്കൂൾ. സ്കൗട്ട് ആൻഡ് ഗൈഡ് കുട്ടികളുടെ നേതൃത്വത്തിൽ മൈക്രോ ഗ്രീൻ സാധ്യതകളെക്കുറിച്ച് പഠിച്ച കുട്ടികൾ കോവിഡ് കാലത്ത് വേറിട്ട കൃഷിരീതി പരീക്ഷിക്കുകയായിരുന്നു. ഓണത്തിന് ഒരുമുറം പച്ചക്കറി എന്ന പദ്ധതിയുടെ ഭാഗമായാണ്​ മൈക്രോ ഗ്രീൻ പദ്ധതി വീടുകളിൽ പരീക്ഷിച്ച്​ വിജയിച്ചത്​.

ചെറുപയർ, വൻപയർ, ഉലുവ, ചീര എന്നിങ്ങനെ വിവിധ ഇനം വിത്തുകളാണ് കുട്ടികൾ പരീക്ഷിച്ചത്. 10 ദിവസം കൊണ്ട് പ്രായമാകുന്ന ചെടികൾ തോരൻ, ഓംലെറ്റ് എന്നിവ ഉണ്ടാക്കാൻ വളരെ നല്ലതാണെന്ന് കുട്ടികൾ പറയുന്നു. മണ്ണും വളവും കീടനാശിനി പ്രയോഗവും ഇല്ലാതെ ഇഷ്​ടംപോലെ ഇലക്കറികൾ ഉൽപാദിപ്പിക്കുക എന്നത് കുട്ടികളെ സംബന്ധിച്ച്​ കൗതുകവും മാതാപിതാക്കൾക്ക്​ പുതുമയും ആയിരുന്നു. അധ്യാപകരായ ഡോ. സിൽവി തെരേസ് ജോസഫ്, ബിജു ജോസഫ് എന്നിവരാണ്​ പരിശീലനം നൽകിയത്.