കർഷകരിൽ നിന്ന്​ സ്വകാര്യവ്യക്തി കോടികൾ തട്ടിയ സംഭവം: ഉന്നതതല അന്വേഷണം വേണം -കോൺഗ്രസ്​

നെടുങ്കണ്ടം: കർഷകരിൽനിന്ന്​ ഏലക്ക അവധിക്ക് വാങ്ങി സ്വകാര്യവ്യക്തി കോടികൾ തട്ടിയ സംഭവത്തിൽ ഉന്നതതല അന്വേഷണം നടത്തണമെന്ന്​ ഡി.സി.സി പ്രസിഡൻറ് ഇബ്രാഹിംകുട്ടി കല്ലാർ ആവശ്യപ്പെട്ടു.

കാൽവരിമൗണ്ട് സ്വദേശി ജനങ്ങളിൽനിന്ന്​ വിവിധ ഇനത്തിൽ വൻ തുക കടംവാങ്ങി ഒളിവിൽ പോയിട്ട് ഒരു മാസം കഴിഞ്ഞിട്ടും അന്വേഷണം അട്ടിമറിക്കാനാണ് ലോക്കൽ പൊലീസ്​ ശ്രമിക്കുന്നത്. പൊലീസ്​ നടപടിയിൽ ദുരൂഹതയുണ്ട്​.

നൂറുകണക്കിന് പരാതികൾ തങ്കമണി ഉൾപ്പെടെ പൊലീസ്​ സ്​റ്റേഷനുകളിൽ ലഭിച്ചിട്ടും നടപടിയില്ലാത്തത്​ ഭരണ നേതൃത്വത്തി​െൻറ ഇടപെടൽമൂലമാണ്​.

പൊലീസ്​ അന്വേഷണം തൃപ്തികരമല്ലാത്ത സാഹചര്യത്തിൽ ഉന്നതതല അന്വേഷണം നടത്തണം. കർഷകരുടെ പണം അടിയന്തരമായി തിരിച്ചുനൽകിയില്ലെങ്കിൽ സമരപരിപാടികളുമായി കോൺഗ്രസ്​ പാർട്ടി മുന്നോട്ട് വരുമെന്നും അദ്ദേഹം പറഞ്ഞു.