ഞായറാഴ്​ചയെത്തിയത്​ 4000 പേർ; രാമക്കൽമേട്ടിലേക്ക്​ സഞ്ചാരികൾ ഒഴുകുന്നു

നെടുങ്കണ്ടം (ഇടുക്കി): പ്രകൃതിയുടെ വശ്യസൗന്ദര്യവും ഐതിഹ്യങ്ങളും കെട്ടുപിണഞ്ഞുകിടക്കുന്ന ഇടുക്കി ജില്ലയിലെ പ്രധാന ടൂറിസ്​റ്റ്​ കേന്ദ്രങ്ങളിലൊന്നായ രാമക്കൽമേട്ടിൽ സഞ്ചാരികളുടെ തിരക്ക് വർധിച്ചുതുടങ്ങി. കോവിഡി​െൻറ കടന്നുവരവോടെ സഞ്ചാരികളുടെ ഒഴുക്ക് നിലച്ച ഇവിടെ മാസങ്ങൾക്കുശേഷം ഞായറാഴ്ച ഏറെ തിരക്ക് അനുഭവപ്പെട്ടു. 4000ഓളം സഞ്ചാരികൾ എത്തിയതായാണ് അനൗദ്യോഗിക കണക്ക്. ഔദ്യോഗിക കണക്കുപ്രകാരം രണ്ടായിരം പേർ എത്തി. കഴിഞ്ഞ ഒരുവർഷത്തിനി​െട ഏറ്റവും കൂടുതൽ സഞ്ചാരികൾ എത്തിയത് ഞായറാഴ്ചയായിരുന്നു. രണ്ടാഴ്ചയായി ദിനേന ആയിരത്തോളം പേർ എത്തുന്നുണ്ട്. പ്രധാന ഗേറ്റുവഴി മാത്രമാണ് സഞ്ചാരികളെ കയറ്റിവിടുന്നത്. കോവിഡ്​ േപ്രാട്ടോകോൾ പാലിച്ചാണിത്.

പ്രകൃതിയുടെ വശ്യസൗന്ദര്യവും കാറ്റാടിപ്പാടങ്ങളുമാണ്​ സഞ്ചാരികളെ ആകർഷിക്കുന്നത്​. ഈ വർഷം ക്രിസ്​മസും ന്യൂ ഇയറും പ്രമാണിച്ച് കൂടുതൽ സഞ്ചാരികൾ എത്തിച്ചേരാനാണ് സാധ്യത. മൂന്നാർ-തേക്കടി റൂട്ടിൽ നെടുങ്കണ്ടത്തുനിന്നും 16 കിലോമീറ്റർ അകലെ തമിഴ്നാട് അതിർത്തിയിലാണ് വിനോദസഞ്ചാര കേന്ദ്രം. ഇവിടെനിന്ന്​ താഴേക്ക് നോക്കിയാൽ കൊടൈക്കനാലിലെ ആത്മഹത്യ മുനമ്പിനെ വെല്ലുന്ന അഗാധ താഴ്വാരം കാണാം. താഴെ ചതുരംഗ കളങ്ങൾ പോലെ പരന്നുകിടക്കുന്ന നിലക്കടല പാടങ്ങളും. കേരളത്തി​െൻറയും തമിഴ്നാടി​െൻറയും അതിർത്തികൾ നിരനിരയായി നിൽക്കുന്ന തെങ്ങിൻ തോപ്പുകളും വശ്യമായ കാഴ്​ചയാകുന്നു.

ആയിരക്കണക്കിന് ഏക്കർ കൃഷിയിടങ്ങൾ. അവിടങ്ങളിലെ കാർഷികവിഭവങ്ങളുടെ തരം തിരിവനുസരിച്ചുള്ള നിറഭേദങ്ങൾകൂടി ആകുമ്പോൾ വർണച്ചായങ്ങൾ ചേർത്ത് തുന്നിയ ചിത്രക്കമ്പളംപോലെ സുന്ദരമാണ് വിദൂര ദൃശ്യങ്ങൾ. ഇതിനിടയിൽ നിരവധി പട്ടണങ്ങൾ -കമ്പം, ഉത്തമപാളയം, കോമ്പ, തേവാരം, ബോഡിനായ്ക്കന്നൂർ തുടങ്ങിയവയും ചില ഗ്രാമങ്ങളും കാണാം. സന്ധ്യ മയങ്ങുന്നതോടെ ഈ പ്രദേശങ്ങൾ കൂടുതൽ സൗന്ദര്യമുളവാക്കുന്നു. തേനി ജില്ലയിലെ ഈ പട്ടണങ്ങൾ സന്ധ്യക്ക് തെളിയുന്ന വൈദ്യുതിപ്രഭയിൽ ഒരായിരം നക്ഷത്രങ്ങൾ ഒന്നിച്ചുതെളിയുന്ന ആകാശം പോലെ കൗതുകക്കാഴ്ചയാണ്.