നാട്ടിലേക്ക് മടങ്ങിയത് 1550 തൊഴിലാളികൾ

തൊടുപുഴ: ജില്ലയില്‍നിന്ന് ചൊവ്വാഴ്ച നാട്ടിലേക്ക് മടങ്ങിയത് 1550 തൊഴിലാളികൾ. 31 കെ.എസ്.ആര്‍.ടി.സി ബസുകളാണ് തൊഴിലാളികള്‍ക്കായി ഉപയോഗിച്ചത്. തൊടുപുഴ -450, ദേവികുളം -300, ഉടുമ്പന്‍ചോല -250, ഇടുക്കി -350, പീരുമേട് -200 എന്നിങ്ങനെയാണ് താലൂക്കുകളിൽനിന്ന്​ തൊഴിലാളികള്‍ മടങ്ങിയത്. തൊടുപുഴ താലൂക്കില്‍നിന്ന് 450 അതിഥി തൊഴിലാളികള്‍ പശ്ചിമബംഗാളിലേക്ക് മടങ്ങി.

തൊടുപുഴയില്‍നിന്ന്​ ആലുവ റെയില്‍വേ സ്​റ്റേഷനിലെത്തിച്ചാണ്​ തൊഴിലാളികളെ യാത്രയാക്കിയത്. വൈകീട്ട് 9.30ന് കൊല്‍ക്കത്തയിലേക്കുള്ള ട്രെയിനിലാണ് ഇവര്‍ മടങ്ങുന്നത്. മടങ്ങാനുള്ള തൊഴിലാളികള്‍ക്ക് താലൂക്കിലെ അതത് വില്ലേജ് ഓഫിസുകള്‍ മുഖാന്തരം നേരത്തേ തന്നെ അറിയിപ്പ് നല്‍കിയിരുന്നു. 

ചൊവ്വാഴ്ച രാവിലെ മുതല്‍ തൊടുപുഴയിലെത്തിയ ഇവര്‍ക്കായി സ​െൻറ്​ സെബാസ്​റ്റ്യൻ പള്ളിയോട് ചേര്‍ന്ന് ഹെല്‍പ് ​െഡസ്‌ക് തയാറാക്കിയിരുന്നു. രാവിലെ ഒമ്പതുമുതല്‍ പുറപ്പുഴ, മുട്ടം സി.എച്ച്.സികളിലെ ആരോഗ്യ വകുപ്പ് ഉദ്യോഗസ്ഥരുടെ നേതൃത്വത്തില്‍ ഇവരെ പരിശോധിച്ച് ഹെല്‍ത്ത് സര്‍ട്ടിഫിക്കറ്റുകള്‍ ലഭ്യമാക്കി.

ഇവര്‍ക്കാവശ്യമായ യാത്രാനുമതി ലഭ്യമാക്കുന്നതിന് തൊടുപുഴ തഹസില്‍ദാര്‍ കെ.എം. ജോസുകുട്ടിയുടെ നേതൃത്വത്തില്‍ റവന്യൂ വകുപ്പ്​ അധികൃതരും മുഴുവന്‍ സമയവും സ്ഥലത്തുണ്ടായിരുന്നു. തൊഴിലാളികള്‍ക്ക് ആവശ്യമായ ലഘുഭക്ഷണവും വെള്ളവും ഇവിടെനിന്ന്​ ലഭ്യമാക്കി. ബുധനാഴ്ചയും 240 തൊഴിലാളികള്‍ പശ്ചിമബംഗാളിലേക്ക് മടങ്ങുമെന്ന് തഹസില്‍ദാര്‍ പറഞ്ഞു.