പാർട്ടി കോൺഗ്രസിന്​ ജില്ലയിൽ സി.പി.എം തയാറെടുപ്പ്​ തുടങ്ങി

പാർട്ടി കോൺഗ്രസിന്​ ജില്ലയിൽ സി.പി.എം തയാറെടുപ്പ്​ തുടങ്ങികണ്ണൂർ: പാർട്ടിയുടെ ചുവന്ന മണ്ണിൽ പാർട്ടി കോൺഗ്രസിന്​ സി.പി.എം ജില്ല നേതൃത്വം തയാറെടുപ്പ്​ തുടങ്ങി. ഇതി​ൻെറ മുന്നോടിയായി ജില്ലയിലെ ബ്രാഞ്ചു മുതലുള്ള സമ്മേളനങ്ങൾ നടത്താനുള്ള ആലോചന പാർട്ടി ജില്ല നേതൃത്വം തുടങ്ങി. ബ്രാഞ്ച് മുതൽ ജില്ലവരെയുള്ള ഘടകങ്ങളുടെ സമ്മേളനങ്ങൾ വേഗത്തിൽ പൂർത്തിയാക്കാനുള്ള ഒരുക്കങ്ങളുടെ ഭാഗമായി സി.പി.എം ജില്ല നേതൃയോഗം തുടങ്ങി. ഇതിന്​ തുടക്കം കുറിച്ച്​ ജില്ലസെക്രട്ടറിയേറ്റ് യോഗം പി.ബി അംഗം കോടിയേരി ബാലകൃഷ്​ണ​ൻെറ നേതൃത്വത്തിൽ തിങ്കളാഴ്​ച നടന്നു. ചൊവ്വാഴ്​ച നടക്കുന്ന ജില്ല കമ്മിറ്റി യോഗത്തിലും കോടിയേരിപങ്കെടുക്കും.പാർട്ടി കോൺഗ്രസ്​ നടക്കുന്ന സാഹചര്യത്തിൽ ജില്ലയിൽ പാർട്ടിയെ ഒറ്റക്കെട്ടായി സജ്ജമാക്കുന്നതിനാണ്​ നേതൃത്വം ശ്രമം തുടങ്ങിയത്​. സംസ്ഥാനത്ത് ഏറ്റവും കൂടുതൽ അംഗങ്ങളുള്ള ജില്ലയായ കണ്ണൂരിൽ നിയമസഭ തെരഞ്ഞെടുപ്പിനുശേഷം പാർട്ടിയിൽ പ്രത്യക്ഷപ്പെട്ട ചില അസ്വാരസ്യങ്ങൾ പരിഹരിച്ച്​ പാർട്ടി സംവിധാനം കെട്ടുറപ്പുള്ളതാക്കി പാർട്ടി കോൺഗ്രസിന്​ നേതൃത്വം നൽകാനാണ്​ സെക്രട്ടറിയേറ്റിലെ തീരുമാനം. അടുത്തിടെയുണ്ടായ അസ്വാരസ്യങ്ങൾ പരിഹരിക്കുന്നതിനാണ്​ കോടിയേരി ബാലകൃഷ്​ണ​ൻെറ ഇടപെടൽ ലക്ഷ്യമാക്കുന്നത്​. പാർട്ടി സമ്മേളനങ്ങൾക്ക് മുന്നോടിയായി ജില്ലയിലെ ഇടഞ്ഞുനിൽക്കുന്ന മുതിർന്ന നേതാക്കളെ അനുനയിപ്പിക്കാൻ കോടിയേരി മുൻകൈയെടുക്കും. ബ്രാഞ്ച് മുതൽ ഏരിയാതലം വരെയുള്ള സമ്മേളനങ്ങളുടെ തീയതികൾക്ക്​ അന്തിമ രൂപം നൽകും. അടുത്തമാസം രണ്ടാം വാരം മുതൽ ബ്രാഞ്ച് സമ്മേളനങ്ങൾ തുടങ്ങാനാണ് സംസ്​ഥാന നേതൃത്വത്തി​ൻെറ നിർദേശം. സംസ്ഥാനത്തെ ആദ്യത്തെ ജില്ല സമ്മേളനം കണ്ണൂരിലാകും നടക്കുക. പി. ജയരാജ​ൻെറ പ്രശ്​നം, തെരഞ്ഞെടുപ്പിൽനിന്ന്​ വിട്ടുനിൽക്കേണ്ടിവന്നതിൽ ഇ.പി. ജയരാജനുള്ള നീരസം, പാർട്ടി പ്രവർത്തകരായവർ സ്വർണക്കടത്ത് ക്വട്ടേഷനിലുൾപ്പെട്ട സംഭവം എന്നിവ സി.പി.എമ്മിനകത്ത്​ ഇനിയും പരിഹരിക്കപ്പെടേണ്ടതുണ്ട്​. നിയമസഭ തെരഞ്ഞെടുപ്പില്‍ മികച്ച വിജയം നേടിയതിനുപിന്നാലെ ഇത്തരം പ്രശ്​നങ്ങൾ നേതൃത്വത്തിന്​ മുന്നിൽ പരിഹരിക്കപ്പെടേണ്ടതുണ്ട്​. ഇത്തരം പ്രശ്​നങ്ങൾ തീർക്കലാണ് കോടിയേരിയുടെ സന്ദർശന ലക്ഷ്യം. പ്രസ്ഥാനത്തിന് അവമതിപ്പുണ്ടാക്കുന്ന പ്രവർത്തനങ്ങൾ ഒരു പ്രവർത്തക​ൻെറ ഭാഗത്തുനിന്നുമുണ്ടാകാൻ പാടില്ലെന്നും അച്ചടക്കത്തോടെ പ്രവർത്തിക്കാൻ ഏതൊരു പ്രവർത്തകനും ബാധ്യതയുണ്ടെന്നും ജില്ല സെക്രട്ടറിയേറ്റ്​ യോഗത്തിൽ കോടിയേരി ബാലകൃഷ്​ണൻ വ്യക്​തമാക്കി. പാർട്ടിയുടെ അടിത്തറ മെച്ചപ്പെടുത്തുന്നതോടൊപ്പം വിശ്വാസ്യതയും നേടിയെടുക്കാൻ പ്രവർത്തകന് കഴിയണമെന്നതാണ് പാർട്ടി നിലപാടെന്നും കോടിയേരി വിശദീകരിച്ചു.പാർട്ടി കോൺഗ്രസുമായി ബന്ധപ്പെട്ട മുന്നൊരുക്കങ്ങൾക്കാണ് കോടിയേരി എത്തിയതെന്ന വിശദീകരണമാണ്​ സി.പി.എം നേതൃത്വം നൽകുന്നത്​.