മാഹിയിൽ സ്കൂൾ പ്രവേശനോത്സവം

മാഹി: ഒന്നേ മുക്കാൽ വർഷത്തെ നീണ്ട ഇടവേളക്ക് ശേഷം തിങ്കളാഴ്ച ക്ലാസ് തുടങ്ങിയ മാഹിയിലെ വിവിധ വിദ്യാലയങ്ങളിൽ പ്രവേശനോത്സവം ആഘോഷപൂർവം നടത്തി. ഗവ. മിഡിൽ സ്കൂൾ അവറോത്ത് ഈസ്​റ്റ്​ പള്ളൂർ സ്കൂൾ പ്രവേശനോത്സവം രമേശ് പറമ്പത്ത് എം.എൽ.എ ഉദ്ഘാടനം ചെയ്തു. വിദ്യാലയപരിസരത്ത് ചിത്രകലാധ്യാപകൻ ടി.എം. സജീവൻ നിർമിച്ച ആനയുടെ ശിൽപവും ചമയങ്ങളും ഒരുക്കി. മാഹി ഗവ.എൽ.പി സ്കൂൾ ചെറുകല്ലായിയിൽ ചെണ്ടമേളത്തി​ൻെറയും പുഷ്പവൃഷ്​ടിയുടെയും അകമ്പടിയോടെയാണ് നവാഗതരെ വരവേറ്റത്. പ്രധാനാധ്യാപിക കെ. ബീന ഉദ്ഘാടനം ചെയ്തു. പി.ടി.എ പ്രസിഡൻറ് പി.പി. വിജേഷ് അധ്യക്ഷത വഹിച്ചു. വിദ്യാർഥികൾക്കെല്ലാം ഉപഹാരങ്ങളും നൽകി. ചാലക്കര ഉസ്മാൻ ഗവ. ഹൈസ്കൂളിൽ പ്രവേശനോത്സവം രമേശ് പറമ്പത്ത് എം.എൽ.എ ഉദ്ഘാടനം ചെയ്തു. പ്രവേശനോത്സവത്തോടനുബന്ധിച്ച് സംഘടിപ്പിച്ച ഒമ്പതാം ക്ലാസ് വിദ്യാർഥിനി മാനസ ജയകുമാർ കോവിഡ് പ്രതിരോധത്തി​ൻെറ വീട്ടിലിരിപ്പുകാലത്ത് വരച്ച മുപ്പതോളം ചിത്രരചനകളുടെ പ്രദര്‍ശനമായ മാനസം 2021 ആര്‍ട്ട് എക്സിബിഷനും രമേശ് പറമ്പത്ത് ഉദ്ഘാടനം ചെയ്തു. സന്ദീവ് അധ്യക്ഷത വഹിച്ചു.