മാക്കൂട്ടം ചുരത്തിൽ വാഹനാപകടം: രണ്ടുപേർക്ക് പരിക്ക്

മൈസൂരുവിൽനിന്ന്​ തലശ്ശേരിയിലേക്ക് പേരക്കയും കയറ്റിവന്ന പിക് അപ്പാണ്​ മറിഞ്ഞത് ഇരിട്ടി: മാക്കൂട്ടം ചുരത്തിൽ പിക് അപ് ജീപ് റോഡരികിലെ താഴ്ചയിലേക്ക് മറിഞ്ഞ് രണ്ടുപേർക്ക് പരിക്ക്. വെള്ളിയാഴ്ച പുലർച്ച അഞ്ചോടെയാണ് മൈസൂരുവിൽനിന്ന്​ തലശ്ശേരിയിലേക്ക് പേരക്കയും കയറ്റിവന്ന പിക്​ അപ് മറിഞ്ഞത്. റോഡിൽ നിന്നും 20 മീറ്ററോളം താഴ്ചയിലേക്കാണ് വാഹനം മറിഞ്ഞത്. അപകടത്തിൽ ബെല്ലാരി സ്വദേശികളായ രുദ്രാക്ഷൻ, നാഗപ്പൻ എന്നിവർക്കാണ് പരിക്കേറ്റത്. അപകടവിവരമറിഞ്ഞ് ഇരിട്ടിയിൽനിന്ന്​ അഗ്​നിശമനസേനയും ആംബുലൻസും സ്ഥലത്തെത്തി. വാഹനത്തിൽ കുടുങ്ങിക്കിടന്നവരെ ഇരിട്ടിയിലെ സ്വകാര്യ ആശുപത്രിയിലെത്തിച്ചു. ഇരുവരുടെയും പരിക്ക് ഗുരുതരമല്ല. സ്ഥിരമായി വാഹനാപകടം നടക്കുന്ന വളവിലാണ് പിക് അപ് മറിഞ്ഞത്. റോഡരികിലെ സംരക്ഷണ കവചം തകർത്താണ് താഴ്ചയിലേക്ക് മറിഞ്ഞത്.