ആശുപ​ത്രിയിൽനിന്ന്​ മൃതദേഹം മാറി നൽകി; തിരിച്ചറിഞ്ഞത്​ സംസ്​കാര ചടങ്ങിനിടെ

കണ്ണൂർ: കണ്ണൂരില്‍ ആശുപത്രിയില്‍ നിന്നും മൃതദേഹം മാറി നല്‍കി. ബന്ധുക്കള്‍ തിരിച്ചറിഞ്ഞത് സംസ്​കാര ചടങ്ങിനിടെ. തളിപറമ്പ്​ സഹകരണ ആശുപത്രിയില്‍ നിന്നും ബന്ധുക്കള്‍ക്ക് നല്‍കിയ മൃതദേഹമാണ്​ മാറിപ്പോയത്​.

രണ്ട് ദിവസം മുമ്പാണ് തളിപ്പറമ്പ്​ സഹകരണ ആശുപത്രിയില്‍ വെച്ച്‌ ആലക്കോട് നെല്ലിപ്പാറക്കടുത്ത കണ്ണാടിപ്പാറ സ്വദേശി ശിവദാസ കൈമള്‍ മരിച്ചത്. കോവിഡ് പരിശോധന അടക്കമുളള നടപടികള്‍ക്കായി മൃതദേഹം ആശുപത്രിയിലെ ഫ്രീസറിലേക്ക് മാറ്റി. കോവിഡ് പരിശോധനാഫലം നെഗറ്റീവ് ആയതിനെ തുടര്‍ന്ന് ഞായറാഴ്​ചയാണ്​ മൃതദേഹം ബന്ധുക്കള്‍ക്ക് വിട്ടു നല്‍കിയത്.

വീട്ടിലെത്തിച്ച മൃതദേഹം കുളിപ്പിച്ച ശേഷം ബന്ധുക്കള്‍ സംസ്​കാര ചടങ്ങുകളിലേക്ക് കടന്നു. നാട്ടുകാരും അകന്ന ബന്ധുക്കളും മൃതദേഹത്തില്‍ അന്തിമോപചാരമര്‍പ്പിച്ചു. ശേഷമായിരുന്നു അടുത്ത ബന്ധുക്കളുടെ ഊഴം. മരിച്ച ശിവദാസ കൈമളുടെ മരുമകനാണ് മൃതദേഹം അമ്മാവ​േൻറതല്ലെന്ന സംശയം ആദ്യം ഉന്നയിച്ചത്. പിന്നാലെ അടുത്ത ബന്ധുക്കളും സംശയം ഉന്നയിച്ചു. എന്നാല്‍, ഫ്രീസറില്‍ സൂക്ഷിച്ചതിനെ തുടര്‍ന്ന് രൂപ മാറ്റം വന്നതാകാമെന്നായി ഒരു കൂട്ടരുടെ വാദം. ഒടുവില്‍ മക്കള്‍ പിതാവി​െൻറ വലതു കയ്യിലെ മറുക് പരിശോധിച്ചപ്പോഴാണ് മൃതദേഹം മാറിപ്പോയ കാര്യം മനസിലായത്.

ബന്ധുക്കള്‍ ആശുപത്രിയിലേക്ക് വിളിച്ച്‌ മൃതദേഹം മാറിയ വിവരം പറഞ്ഞെങ്കിലും ആദ്യം അവര്‍ സമ്മതിച്ചില്ല. ഏതാണ്ട് ഇതേ സമയത്ത് തന്നെ ആശുപത്രിയിലെ ഒരു ഡോക്​ടറുടെ പിതാവും മരിച്ചിരുന്നു. അദ്ദേഹത്തിന്‍റെ മൃതദേഹവും ഇവിടെ ഫ്രീസറില്‍ സൂക്ഷിച്ചിരുന്നു. സംസ്​കാരത്തിനായി മൃതദേഹം എടുക്കാനെത്തിയ ഡോക്​ര്‍ തന്‍റെ പിതാവിന്‍റെ മൃതദേഹം പരിശോധിച്ചപ്പോഴാണ്​ മാറിയ വിവരം ആശുപത്രി അധികൃതർക്കും മനസ്സിലായത്​.

തുടർന്ന്​ ശിവദാസ കൈമളുടെ മൃതദേഹവുമായി ആശുപത്രി ആംബുലന്‍സ്‌ അപ്പോള്‍ തന്നെ ആലക്കോട്ടേക്ക് പുറപ്പെട്ടു. അന്ത്യ കര്‍മ്മ ചടങ്ങുകള്‍ പാതിവഴിക്ക് നിര്‍ത്തി ഡോക്ടറുടെ പിതാവിന്‍റെ മൃതദേഹം തളിപ്പറമ്പിലേക്കും. തുടർന്ന്​ ഇരുവരുടെയും ബന്ധുക്കൾ വഴി​മധ്യേ ഒടുവള്ളിതട്ടിൽ വെച്ച്‌ മൃതദേഹങ്ങള്‍ കൈമാറുകയായിരുന്നു.