കാർ നിയന്ത്രണം വിട്ട് തലകീഴായി മറിഞ്ഞ് ഒരാൾക്ക് പരിക്ക്

ഇരിട്ടി: കാർ നിയന്ത്രണം വിട്ട് തലകീഴായി മറിഞ്ഞ് ഒരാൾക്ക് പരിക്കേറ്റു. ഇരിട്ടി പഴയപാലം സ്വദേശി ഫൈസലിനാണ് പരിക്കേറ്റത്. തിങ്കളാഴ്ച ഉച്ചക്ക് 1.30ഓടെ പേരാവൂർ -ഇരിട്ടി റൂട്ടിൽ പയഞ്ചേരി എസ്.ബി.ഐക്ക് സമീപത്തുവെച്ച് കാർ റോഡരികിൽ നിർത്തിയ മറ്റൊരു കാറിലിടിച്ച് നിയന്ത്രണം വിട്ട് റോഡിന് കുറുകെ തലകീഴായി മറിയുകയായിരുന്നു. ഓടിക്കൂടിയ ആളുകൾ കാർ ഡ്രൈവർ ഫൈസലിനെ പുറത്തെടുത്ത് ആശുപത്രിയിലെത്തിച്ചു.

അപകടത്തെത്തുടർന്ന് ഇരിട്ടി -പേരാവൂർ റൂട്ടിൽ ഗതാഗതം തടസ്സപ്പെട്ടു. വാഹനം മാറ്റിയതിന് ശേഷമാണ് ഗതാഗതം പുന:സ്ഥാപിച്ചത്. ഈ മേഖലയിൽ റോഡരികിൽ വാഹനങ്ങൾ പാർക്ക് ചെയ്യുന്നത് പല അപകടങ്ങൾക്കും ഇടയാകാറുണ്ട്. റോഡരികിൽ അലക്ഷ്യമായി പാർക്ക് ചെയ്യുന്ന വാഹനങ്ങൾക്കെതിരെ നടപടി സ്വീകരിക്കണമെന്നാണ് നാട്ടുകാർ ആവശ്യപ്പെടുന്നത്.