കൃപാകരയുടേത് ആൾക്കൂട്ട കൊലപാതകം: അന്വേഷണം നാലുപേരെ കേന്ദ്രീകരിച്ച്​

മഞ്ചേശ്വരം: റോഡരികിൽ രക്തത്തിൽ കുളിച്ചു അത്യാസന്ന നിലയിലായ യുവാവ് മരണപ്പെട്ടത് ആൾക്കൂട്ട മർദനത്തെ തുടർന്ന്. പ്രതികളെ പിടികൂടാന്‍ പൊലീസ് അന്വേഷണം വ്യാപിപ്പിച്ചു. മീഞ്ച പഞ്ചായത്തിലെ മിയാപദവ് ബേരിക്കയിലെ കൃപാകര എന്ന അണ്ണുവി​െൻറ (28) ദേഹത്ത് ചെറുതും വലുതുമായ 25 ഓളം മുറിവുകളാണുണ്ടായിരുന്നത്.

കമ്പിപ്പാരകൊണ്ട് തലക്കേറ്റ ആഴത്തിലുള്ള മുറിവാണ് മരണകാരണമെന്ന് സംശയിക്കുന്നു. പോസ്​റ്റുമോര്‍ട്ടം റിപ്പോര്‍ട്ട് ലഭിച്ചാല്‍ മാത്രമേ മരണകാരണം വ്യക്തമാവുകയുള്ളൂ.കേസിൽ പ്രധാനമായും നാലു പേരെ കേന്ദ്രീകരിച്ചാണ് പൊലീസ് അന്വേഷണം നടത്തുന്നത്. ബുധനാഴ്ച രാത്രി ഒമ്പതരയോടെ മിയാപദവ് കെതങ്ങാട്ടെ ജിതേഷി​െൻറ വീടിന് സമീപമുണ്ടായ അക്രമത്തിലാണ് കൃപാകര കൊല്ലപ്പെട്ടത്.കൃപാകരയെ മർദിക്കാന്‍ എത്രപേരുണ്ടായിരുന്നുവെന്ന് വ്യക്തമല്ല. 20ഓളം പേരുണ്ടായിരുന്നുവെന്നാണ് പൊലീസിന് ലഭിച്ച വിവരം.

ഇവരെല്ലാം സംഘ്​പരിവാർ പ്രവർത്തകരാണെന്നാണ്​ പ്രാഥമിക നിഗമനം.മരണവുമായി ബന്ധപ്പെട്ട് സംഭവം നടന്ന സ്ഥലത്തിന് സമീപത്തെ രണ്ടുവീട്ടുകാരെ ചോദ്യം ചെയ്യുമെന്ന് പൊലീസ് പറഞ്ഞു. മഞ്ചേശ്വരം സ്​റ്റേഷന്‍ ഹൗസ് ഓഫിസര്‍ പി. അനൂപ്കുമാര്‍, എസ്.ഐ രാഘവന്‍, അഡീ. എസ്.ഐ മധുസൂദനന്‍ എന്നിവരുടെ നേതൃത്വത്തിലാണ് അന്വേഷണം.