എം.ഡി.എം.എയുമായി യുവാക്കൾ അറസ്റ്റിൽ

മാഹി: മാഹിയിൽ വൻ ലഹരിമരുന്ന് വേട്ട. 20.670 ഗ്രാം എം.ഡി.എം.എയുമായി യുവാക്കൾ അറസ്റ്റിൽ. പള്ളൂർ നടവയൽ കോഓപറേറ്റിവ് കോളജിന് സമീപത്തുവെച്ച്, ചൊക്ലി നിടുമ്പ്രം സാംസ്കാരിക നിലയത്തിന് സമീപത്തെ കയ്യാലക്കണ്ടി കെ.കെ. റാഷിദ് (24), തലശ്ശേരി നെട്ടൂർ സ്വദേശി ഷീജ നിവാസിൽ ഷാൽവിൻ റോബർട്ട് (ഷാൽവിൻ ഷാലു-25) എന്നിവരെയാണ് പൊലീസ് അറസ്റ്റ് ചെയ്തത്.

മാഹിയിലും പരിസര പ്രദേശങ്ങളിലും മയക്കുമരുന്ന് വിൽപന നടത്തുന്നതായുള്ള രഹസ്യ സന്ദേശത്തിന്റെ അടിസ്ഥാനത്തിൽ പുതുച്ചേരി എസ്.എസ്.പി ദീപിക ഐ.പി.എസിന്റെ നിർദേശാനുസരണം മാഹി പൊലീസ് സൂപ്രണ്ട് രാജശങ്കർ വെള്ളാട്ട് രൂപവത്കരിച്ച പ്രത്യേക സ്ക്വാഡ് നടത്തിയ പരിശോധനയിലാണ് പ്രതികൾ പിടിയിലായത്.

ഇവരിൽനിന്ന് 60,000 രൂപ വിലമതിക്കുന്ന 20.670 ഗ്രാം എം.ഡി.എം.എയാണ് പിടികൂടിയത്. വ്യാഴാഴ്ച പള്ളൂർ നടവയലിൽവെച്ച് 0.260 ഗ്രാം എം.ഡി.എം.എയുമായി പിടിയിലായ റാഷിദിൽനിന്ന് കിട്ടിയ വിവരങ്ങളുടെ അടിസ്ഥാനത്തിൽ നടത്തിയ പരിശോധനയിലാണ് ഇവരെ പിടികൂടുന്നത്.