ജ്വല്ലറിയിൽ കവർച്ചശ്രമം; മോഷ്​ടാവിനെ നാട്ടുകാർ പിടികൂടി

പയ്യന്നൂർ: വെള്ളൂർ ആലിങ്കീലിലെ ജ്വല്ലറിയിൽ കവർച്ചശ്രമം. കവർച്ചക്കെത്തിയ യുവാവിനെ നാട്ടുകാർ പിടികൂടി പൊലീസിൽ ഏൽപിച്ചു. മോഷണം നടത്താനെത്തിയ ഗുജറാത്തിലെ ഗോദ്ര ജില്ലയിലെ സഫ്രജിനെയാണ്​ (40) നാട്ടുകാർ പിടികൂടിയത്.

ഞായറാഴ്‌ച പുലർച്ച മൂന്നോടെയാണ് ആലിങ്കീൽ ദേശീയ പാതക്കു​ സമീപത്തെ ഐശ്വര്യ ജ്വല്ലറിയിൽ കവർച്ചശ്രമം നടന്നത്. ജ്വല്ലറിക്കു മുന്നിലെത്തിയ മോഷ്​ടാക്കൾ കടയുടെ മുന്നിൽ സ്ഥാപിച്ച നിരീക്ഷണ കാമറയും ഷട്ടറി‍െൻറ ലോക്കും തകർത്ത് ജ്വല്ലറിക്കകത്ത് കയറുകയായിരുന്നു. കാമറ തകർത്തതിനെ തുടർന്ന് ജ്വല്ലറി ഉടമയായ കണിയേരി സ്വദേശി എം.വി. ജയ​െൻറ ഫോണിൽ അലാറം മുഴങ്ങി.

സംശയം തോന്നിയ ജയൻ ജ്വല്ലറിക്കകത്തെ കാമറ ഫോണിൽ പരിശോധിച്ചപ്പോഴാണ് കടയിൽ രണ്ടുപേർ കയറിയതായി കണ്ടത്. ഉടൻ ബന്ധുക്കളെയും നാട്ടുകാരെയും കൂട്ടി കടയിലെത്തുകയായിരുന്നു. ഈ സമയത്ത് രണ്ടംഗ മോഷണസംഘം കടയിൽനിന്ന്​ ഇറങ്ങി ഓടി. ഇവരെ പിന്തുടർന്ന നാട്ടുകാർ ഒരാളെ പിടികൂടിയെങ്കിലും മറ്റേയാൾ രക്ഷപ്പെട്ടു. വിവരമറിയിച്ചതിനെ തുടർന്ന് പയ്യന്നൂർ എസ്.ഐ ഷറഫുദ്ദീനും സംഘവും സ്ഥലത്തെത്തി പ്രതിയെ കസ്​റ്റഡിയിലെടുത്തു.