കാഞ്ഞിരക്കൊല്ലി കാസ്മിത്തോട് പാലം അപകടാവസ്ഥയിൽ

ശ്രീകണ്ഠപുരം: ഭീതിയോടെയാണ് കാല്‍നട-വാഹന യാത്രികര്‍ കാഞ്ഞിരക്കൊല്ലി കാസ്മിത്തോട് പാലത്തിലൂടെ സഞ്ചരിക്കുന്നത്. വര്‍ഷങ്ങള്‍ക്കുമുമ്പ് നിര്‍മിച്ച പാലം ഇന്ന് അപകടാവസ്ഥയിലാണ്. കാഞ്ഞിരക്കൊല്ലി ടൗണിൽ നിന്ന് ശശിപ്പാറ, അളകാപുരി വെള്ളച്ചാട്ടം തുടങ്ങിയ ടൂറിസ്​റ്റ്​ കേന്ദ്രത്തിലേക്ക് പോകുന്ന റോഡിലാണ് കാസ്മിത്തോട് പാലം. പൊതുവേ വീതി കുറവാണ് ഈ പ്രദേശത്തേക്കുള്ള റോഡുകൾക്കും പാലത്തിനും. അതുകൊണ്ടുതന്നെ രണ്ട് വലിയ വാഹനങ്ങള്‍ക്ക് ഒരുമിച്ച് പാലത്തിലൂടെ പോകാന്‍ സാധ്യമല്ല.

കഴിഞ്ഞ കാലവർഷങ്ങളിൽ കർണാടക വനത്തിലുണ്ടായ ശക്തമായ മഴയിലും ഉരുൾപൊട്ടലിലുമാണ് പാലം അപകടത്തിലായത്. ഭീമൻ കല്ലുകളും ശക്തമായ ഒഴുക്കും കാരണം പാലത്തി​െൻറ അടിഭാഗം തകർന്നു. ഒഴുക്ക് ശക്തമാകുന്ന സാഹചര്യത്തിൽ, വെള്ളമിറങ്ങുന്ന ഭാഗം തകരാൻ സാധ്യതയുണ്ട്.

ടൂറിസം മേഖല സജീവമാകുന്നതോടെ വാഹനങ്ങളും സഞ്ചാരികളും വർധിക്കും. ഇത് അപകട സാധ്യത വർധിക്കാനും ഇടയാകും. പാലത്തി​െൻറ ശോച്യാവസ്ഥക്ക് ഉടന്‍ പരിഹാരം കാണണമെന്ന്​ ആവശ്യപ്പെട്ട് പി.ഡബ്ല്യു.ഡി അധികൃതര്‍ക്ക് സി.പി.എം കാഞ്ഞിരക്കൊല്ലി ബ്രാഞ്ചി​െൻറ നേതൃത്വത്തിൽ നിവേദനം നൽകിയിട്ടുണ്ട്.