പുഴയിൽ കുളിക്കാനിറങ്ങിയ വിദ്യാർഥിയെ കാണാതായി

തളിപ്പറമ്പ്: കൂവേരി പൂണങ്ങോട് പുഴയിൽ കുളിക്കാനിറങ്ങിയ വിദ്യാർഥിയെ കാണാതായി. നെല്ലിപ്പാറ സ്വദേശിയും പൂണങ്ങോട്‌ താമസക്കാരനുമായ സെബാസ്​റ്റ്യനെയാണ്​ (18) കാണാതായത്. വ്യാഴാഴ്ച വൈകീട്ട് നാലരയോടെയായിരുന്നു സംഭവം. കൂവേരി പുഴയിൽ കുളിക്കാനായി ഇറങ്ങിയ സെബാസ്​റ്റ്യനും സഹോദരി ജിൻസി (22), അയൽവാസി സനിത (29) എന്നിവരും ഒഴുക്കിൽപ്പെടുകയായിരുന്നു.

സെബാസ്​റ്റ്യനെ രക്ഷിക്കാൻ ശ്രമിക്കുന്നതിനിടെയാണ് മറ്റു രണ്ടുപേർ അപകടത്തിൽപ്പെട്ടത്. സംഭവം ശ്രദ്ധയിൽപ്പെട്ട തോണിക്കാരനായ കൃഷ്ണനാണ് ജിൻസിയെയും സനിതയെയും രക്ഷപ്പെടുത്തിയത്. ഒഴുക്കിൽപ്പെട്ട് കാണാതായ സെബാസ്​റ്റ്യനു വേണ്ടി തളിപ്പറമ്പ് അഗ്നിരക്ഷാ സേനയും പൊലീസും നാട്ടുകാരും ചേർന്ന് തിരച്ചിൽ നടത്തിയെങ്കിലും കണ്ടെത്താനായില്ല.

മണിക്കൂറോളം പുഴയിൽ തിരച്ചിൽ നടത്തിയെങ്കിലും വെളിച്ചക്കുറവുമൂലം തിരച്ചിൽ അവസാനിപ്പിക്കുകയായിരുന്നു. വെള്ളിയാഴ്ച രാവിലെ തിരച്ചിൽ പുനരാരംഭിക്കും.