ലോറി തട്ടി ടെക്സ്റ്റൈൽ ജീവനക്കാരിക്ക് ഗുരുതര പരിക്ക്

മുഴപ്പിലങ്ങാട്: കണ്ണൂർ - തലശ്ശേരി ദേശീയപാതയിൽ കുളം ബസാറിൽ ലോറി തട്ടി യുവതിക്ക് ഗുരുതര പരിക്ക്. മുഴപ്പിലങ്ങാട് കടവുറോഡിൽ തെരുവിലെ ലതക്കാണ് (51) പരിക്കേറ്റത്.

ചാലയിലെ ശബരി ടെക്സ്റ്റൈൽസിലെ ജീവനക്കാരിയാണ്. രാവിലെ ജോലിക്ക് പോകുമ്പോൾ റോഡ് മുറിച്ചുകടക്കവെ എതിരെ വന്ന ലോറി ഇടിക്കുകയായിരുന്നു. ഉടൻ നാട്ടുകാർ തലശ്ശേരി സ്വകാര്യ ആശുപത്രിയിൽ എത്തിച്ചെങ്കിലും കാലിനും തലക്കും ഗുരുതര പരിക്കേറ്റതിനെ തുടർന്ന് കണ്ണൂർ മെഡിക്കൽ കോളജ് ആശുപത്രിയിലേക്ക് മാറ്റി.

വെള്ളിയാഴ്ച രാവിലെ എട്ടിനാണ് അപകടം. ദേശീയപാത നിർമാണത്തിന് വേണ്ടി ഇവിടെ ഒരു ഭാഗം റോഡ് അടച്ചിരുന്നു. ഇതു കാരണം ഇരു വശത്ത് നിന്നും വാഹനങ്ങൾ ഒരേ റോഡിലൂടെയാണ് കടന്നു പോകുന്നത്.അപകട സാധ്യത കണക്കിലെടുത്ത് വ്യാഴാഴ്ച മുതൽ ട്രാഫിക് പൊലീസിനെ നിയമിച്ചിരിക്കുകയാണ്. വ്യാഴാഴ്ച ബസ് തട്ടി പരിക്കേറ്റ യുവാവ് ഇപ്പോഴും ചികിത്സയിലാണ്.