ചെങ്ങളായിയിൽ വൈദ്യുതി വിതരണം ഭൂഗർഭ കേബിൾ വഴിയാക്കും

ശ്രീകണ്ഠപുരം: ചെങ്ങളായി പഞ്ചായത്തിലെ വിവിധ മേഖലകളിൽ ശ്രീകണ്ഠപുരം സബ് സ്​റ്റേഷനിൽ നിന്നുള്ള വൈദ്യുതി വിതരണം ഇനി ഭൂഗർഭ കേബിൾ വഴിയാക്കും.

ഇതിനുള്ള ടെൻഡർ നടപടികളടക്കം അവസാനഘട്ടത്തിലാണെന്ന് കെ.എസ്.ഇ.ബി അധികൃതർ അറിയിച്ചു. ചെങ്ങളായി, വളക്കൈ, കൊയ്യം, ചുഴലി മേഖലകളിലേക്കും സമീപ പ്രദേശങ്ങളായ പരിപ്പായി, ചെമ്പന്തൊട്ടി, കുറുമാത്തൂർ പ്രദേശങ്ങളിലേക്കും വൈദുതി എത്തിക്കുന്നത് ശ്രീകണ്ഠപുരം സബ്‌സ്​റ്റേഷനിലെ 11 കെ.വി വളക്കൈ ഫീഡർ വഴിയായിരുന്നു. വർഷങ്ങൾക്കുമുമ്പ്​ പറമ്പുകൾക്കു കുറുകെ വലിച്ച ഈ ലൈനിൽ കാലപ്പഴക്കം കൊണ്ടും മരക്കൊമ്പുകൾ വീഴുന്നതിനാലും വൈദ്യുതിതടസ്സം പതിവാണ്. 40 കിലോമീറ്ററിലധികം നീളമുള്ള ഈ ലൈൻ മുഴുവനായും മാറ്റിപ്പണിയുന്നതി​െൻറ തയാറെടുപ്പിലാണ് കെ.എസ്.ഇ.ബി അധികൃതർ.

ഇതി​െൻറ ഭാഗമായി വളക്കൈ പാലം മുതൽ തട്ടേരി വരെ ഒരുകിലോമീറ്റർ പുതിയ ലൈൻ വലിച്ച് കമീഷൻ ചെയ്തു. ചെങ്ങളായി മുക്കാടം മുതൽ വളക്കൈ ടൗൺ വരെയും തട്ടേരി മുതൽ ചുഴലി വരെയുള്ള ഏഴു കിലോമീറ്റർ പുതിയ ലൈനി​െൻറ പണിയും നടന്നുകൊണ്ടിരിക്കുന്നു. നെല്ലിക്കുന്ന് മുതൽ മൊട്ടക്കേപ്പീടിക വരെയുള്ള നാലുകിലോമീറ്റർ ലൈൻ പണിക്ക്​ ഉടൻ ടെൻഡർ ക്ഷണിക്കും. പഴയ ക്രോസ്കൺട്രി ലൈനുകൾ മാറ്റി റോഡ് വഴി പുതിയ ലൈൻ ചാർജ് ചെയ്യുന്നതോടെ വൈദ്യുതി തടസ്സത്തിൽ കാര്യമായ കുറവുണ്ടാകും. ഇതി​െൻറ ഭാഗമായി ഫീഡറി​െൻറ നീളം കുറക്കാനും അതുവഴി വോൾട്ടേജ് മെച്ചപ്പെടുത്താനും വേണ്ടിയാണ് ചെങ്ങളായി പഞ്ചായത്തിലേക്ക് ഭൂഗർഭ കേബിൾ വഴി വൈദ്യുതി എത്തിക്കുന്നത്.

ശ്രീകണ്ഠപുരം സബ്‌സ്​റ്റേഷനിൽ നിന്നും ചെങ്ങളായിയിലേക്ക് പരിപ്പായി വഴി രണ്ട് ഭൂഗർഭ കേബിളുകൾ സ്ഥാപിക്കും. തുടർന്ന് നിലവിലെ വളക്കൈ ഫീഡറിനെ വിഭജിച്ച് പുതിയ ചുഴലി ഫീഡർ നിർമിക്കുകയും ചെയ്യുന്നതാണ് പദ്ധതി. 3.5 കിലോമീറ്റർ കേബിളാണ് ഇതിനായി ഉപയോഗിക്കുക. 1.75 കോടി രൂപ പ്രവൃത്തിക്കായി നീക്കിവെച്ചിട്ടുണ്ട്. ഈ മാസം തന്നെ കേബിൾ പണി തുടങ്ങുമെന്ന് അസി. എൻജിനീയർ എ. പത്മനാഭൻ അറിയിച്ചു.