മൂന്ന് നില കെട്ടിടത്തിലേക്ക് ട്രക്ക് ഇടിച്ചുകയറി; ഡ്രൈവർക്ക് പരിക്ക്

മുഴപ്പിലങ്ങാട് : കണ്ണൂർ - തലശ്ശേരി ദേശീയ പാതയിൽ മുഴപ്പിലങ്ങാട് യൂത്തിന് സമീപം സ്വകാര്യ വ്യക്തിയുടെ മൂന്ന് നില കെട്ടിടത്തിലേക്ക് ട്രക്ക് ഇടിച്ചുകയറി ഡ്രൈവർക്ക് പരിക്കേറ്റു. തമിഴ്നാട് സ്വദേശി മണികണ്ഠൻ ( 48 )ന് ആണ് പരിക്കേറ്റത്. ശനിയാഴ്ച പുലർച്ചെ നാലു മണിക്കാണ് അപകടം.

തമിഴ്നാട്ടിൽ നിന്നും സിമന്റ് മിശ്രിതവുമായി മംഗലാപുരത്തേക്ക് പോവുകയായിരുന്ന ടാങ്കർ ട്രക്കാണ് അപകടത്തിൽ പെട്ടത്. കണ്ണൂരിൽ നിന്നും വരുമ്പോൾ മുഴപ്പിലങ്ങാട്-മാഹി ബൈപ്പാസ് ആരംഭിക്കുന്നിടത്ത് വലതുഭാഗത്തെ സർവ്വീസ് റോഡിനോട് ചേർന്ന് പാചകത്തൊഴിലാളി യൂനിയൻ ധർമ്മടം മണ്ഡലം കമ്മിറ്റി ഓഫീസ് പ്രവർത്തിക്കുന്ന സ്വകാര്യ വ്യക്തിയുടെ മൂന്ന് നില കെട്ടിടത്തിലേക്കാണ് ട്രക്ക് ഇടിച്ചു കയറിയത്.

കെട്ടിടത്തിന്റെ മുകളിലത്തെ രണ്ടു നിലകളിലായി ആളുകൾ താമസിക്കുന്നുണ്ട് . ഇടിയുടെ ആഘാതത്തിൽ കെട്ടിടത്തിന് സാരമായ കേടുപാടുകൾ സംഭവിച്ചു.