വൈകിയെത്തുന്ന ഡോക്​ടർമാർ; പൂടംകല്ല്​ ആശുപത്രിയിൽ രോഗികൾക്ക്​ നീണ്ട കാത്തിരിപ്പ്​

കാഞ്ഞങ്ങാട്: താലൂക്ക് ആശുപത്രിയെന്നാണ് പേരെങ്കിലും പ്രാഥമികാരോഗ്യ കേന്ദ്രത്തിൽനിന്ന്​ ലഭിക്കുന്ന സേവനങ്ങൾപോലും പൂടംകല്ല് ആശുപത്രിയിൽ ലഭിക്കുന്നില്ലെന്ന്​ പരാതി. ഡോക്ടർമാർ കൃത്യമായി ജോലിക്കെത്തുന്നില്ലെന്ന്​ ആക്ഷേപമുണ്ട്. പല ദിവസങ്ങളിലും രാവിലെ 9.30 കഴിഞ്ഞാലും ഡോക്ടർമാർ ഡ്യൂട്ടിക്ക് എത്താറില്ല.

ചികിത്സക്കെത്തുന്നവരിൽ കൂടുതൽ 70ന് മുകളിലുള്ളവരും കുട്ടികളുമാണ്​. ദൂരസ്ഥലങ്ങളിൽനിന്ന്​ രാവിലെ എ​േട്ടാടെ എത്തി ഒ.പി ടിക്കറ്റെടുത്ത് മണിക്കൂറുകളോളം കാത്തിരിക്കേണ്ട സ്ഥിതിയാണ്​. രോഗികൾ പലപ്പോഴും ക്ഷമനശിച്ച് ആശ വർക്കർമാരോട്​ തട്ടിക്കയറുന്ന കാഴ്ചയും പതിവാണ്.

പലതവണ പരാതി പറഞ്ഞിട്ടും ഇത്തരക്കാർക്കെതിരെ അധികൃതർ നടപടി സ്വീകരിക്കുന്നില്ലെന്ന്​ രോഗികൾ പറഞ്ഞു. താലൂക്ക് ആശുപത്രി എന്ന നിലയിൽ വേണ്ട സൗകര്യം, പ്രഖ്യാപനം കഴിഞ്ഞ്​ ഒരുവർഷം കഴിഞ്ഞിട്ടും ഒരുക്കാൻ സാധിച്ചിട്ടില്ല. ഇതിനേക്കാൾ കൂടുതൽ സൗകര്യം സാമൂഹികാരോഗ്യ കേന്ദ്രമായി പ്രവർത്തിക്കുമ്പോൾ ഉണ്ടായിരുന്നു.

ഉദ്ഘാടന വേളയിൽ ആരോഗ്യ മന്ത്രി പ്രഖ്യാപിച്ച ഗൈനക്കോളജി വിഭാഗം തുടങ്ങാൻ ഇതുവരെ സാധിച്ചിട്ടില്ല. ഉടൻ പ്രശ്നങ്ങൾക്ക് പരിഹാരമുണ്ടായില്ലെങ്കിൽ പ്രക്ഷോഭം സംഘടിപ്പിക്കാനുള്ള ഒരുക്കത്തിലാണ്​ നാട്ടുകാർ.