ഉപ്പളയിൽ രണ്ട് വീടുകൾ കടലെടുത്തു

മഞ്ചേശ്വരം: ശക്​തമായ കടല്‍ക്ഷോഭത്തെ തുടര്‍ന്ന് ഉപ്പള മുസോടി മലബാര്‍ നഗറിലെ രണ്ടുവീടുകള്‍ പൂര്‍ണമായും കടലെടുത്തു. തസ്‌ലീമ മൂസയുടെ വീട് ശനിയാഴ്ച രാവിലെ ഒമ്പതുമണിയോടെയും മറിയുമ്മ ഇബ്രാഹിമി​െൻറ വീട് വെള്ളിയാഴ്ച രാത്രിയോടെയുമാണ് കടലെടുത്തത്.

ആസിയമ്മ സുലൈമാ‍െൻറ വീട് ഏത് നിമിഷവും കടലെടുക്കാമെന്ന നിലയിലാണ്. വെള്ളിയാഴ്ച പുലര്‍ച്ചയോടെയാണ് കടല്‍ക്ഷോഭം രൂക്ഷമായത്. മുന്നറിയിപ്പിനെ തുടര്‍ന്ന് അയൽവാസികളായ മൂന്ന് വീട്ടുകാരും അടുത്തുള്ള ബന്ധുവീട്ടിലേക്ക് മാറിയതിനാല്‍ ആളപായമുണ്ടായില്ല. കഴിഞ്ഞ വര്‍ഷവും ഈ പ്രദേശത്തെ ഏഴ്​ വീടുകള്‍ കടലെടുത്തിരുന്നു.